Мӧйы вӧсясьёсты вошто егитъёс

Татышлы палъёс сое кырӟась, музыкалы дышетӥсь, "Ӧрӟи" ансамбльлэн одӥгез ёзчиез, егит куриськись шуыса тодо. Палэнысь удмурт гуртъёсын улӥсьёс понна со - кырӟась, нош кунгож сьӧрысь фин-угор ӵыжы-выжыосмы егит воргоронлы удмурт вӧсясьлы шуыса вазисько.
Фридман Кабипянов - дышетӥсь, крезьгурчи, кырӟась. Со школаын дышетскыкуз ик Быдӟымнал дыръя куриськыны пота вылэм. Гуртысьтызы тодмо мӧйы вӧсясь Назип Садриев сое гурт вӧсе ӧтем, аслыз кивоштӥсьлы дасям. Гуртэн вӧсьёсы ветлон сяна, Ф. Кабипянов Выль Татышлыын ортчись Мӧр вӧсьын но юрттӥськись луэм. 2013-тӥ арын Бальзюга гуртэ удмурт но эстон тодосчиос Ранус Садиков но Лииво Ниглас вуизы. Со дырысен кутске удмурт вӧсьёсты видеоматериал карыса дасян. Та уже трос кужымзэ пыртӥз егит вӧсясь Фридман Кабипянов но.
«Вӧсе ветлон – мон понна со кыл кутоно уж. Кызьы ортчоз, умой радъяны быгатомы-а шуыса сюлмаськисько. Куриськон кылъёсты Назип агайлэсь дышетски. Со сяна вӧсьлэн радлыкез ласянь трос тодон-валан сётӥзы Выль Татышлыысь куриськисьёс - Салим Шакиров но Раис Рафиков. Вожъяськыса учкисько Башкортостанысь вӧсясьёслэн тӧрозылэн – Бурай ёросысь Алтау гуртын улӥсь Анатолий Галихановлэн - ужез шоры. Асьсэ гуртазы вӧсез, Элен вӧсез ӟеч радъям сяна, со дыр шедьтэ Интернет пыр та ужез азинтыны но, - вера Ф. Кабипянов. – Туннэ нуналэ удмурт гуртъёсын вӧсяськон ужъёс ӟеч радъямын. Мӧйыос сьӧры егитъёс но кыстӥсько. Со понна тау шуисько республикаысь удмуртъёслэн НКЦ-зылы но солэн нырысетӥ кивалтӥсезлы Ренат Галямшинлы. Азьланьын но та ужмы медаз быры, калык вӧсьёсы мед ветлоз».
Егит вӧсясьлэн малпанъёсаз - Татышлы ёросысь вӧсясьёслэсь сайтсэс яке группазэс кылдытон, вӧсь интыосты (музъемзэ) ужкагазъёсын юнматон. Кӧня ке ар талэсь азьло вӧсясьёсын пумиськон радъямын вал. Отчы республикаысьтымы но Пермь шаерысь Куеда ёросысь куриськисьёс пыриськизы. Соос вӧсясьёслэсь огазеяськонзэс кылдытон сярысь кылпум ӝутӥзы. Та пумысен Фридман Кабипянов шуэ: «Вӧсясьёслэсь огазеяськонзэс кылдытоно, ӵош ужано».