Выль "Дэменлы" - паськыт инвисъёс

- Мон ачим Балтач ёросысь Асавка гуртысь ке но, Уразгильдыысь апайёсыз ваньзэс тодӥсько, тросэз аслам ӵыжы-выжыосы луо. Ӵужапае доры мыныса вераськи, кызьы тӥ, сыӵе мыло-кыдоесь асьтэос, котькытчы вуиськоды, пыриськиськоды, нош кивалтӥсьты ӧвӧл, коллектив люкам ке, ветлӥсь луоз-а шуыса юай. Монэ оскытӥзы, ветлозы шуыса. Озьы люкаським нырысь ваньмы куать кузя, фестивальлэсь положенизэ возьматӥ, ӵӧжи сиён йылолэз возьматом шуыса кенешим. Соин выступленимылы «Самовардэ пукты али» кырӟан бырйим. Кыкетӥ выступленимы Выль Татышлыын «Шулдыр ӝыт» ансамбльлэн юбилеяз луиз, отын сизьым кузя вал ни. Эшшо но лыктыны мылкыд карисьёс вань на. Оскисько, ваньмыз пӧрмоз.

- Вань ук сыӵе веран: «Кораблез кызьы нималод, со озьы ик уяса кошкоз». Ми но сыӵегес ним быръёно шуим. «Дэмен» - со ӵош, валче шуэм ук. Макем трос калык бордамы луоз, сокем умой. Удмуртлыкмес, сям-йылолъёсмес утьыны, возьматыны быгатӥм ке, оло, кыӵе ке оскон кылдоз дыр ортчемъя, репетициос ортчытъяны асьмелэн помещенимы луоз, гуртысь клубез но усьтозы шуыса. Нош али ми котькудзэ репетицимес Зоя Риянова дорын ортчытӥм. Со понна солы туж бадӟым тау кылъёсмес вераськом.

- Али гинэ кутским ай ужаны, но котькытчы ӧтё ини. Ёрос культура дворецлэн сценаяз нырысь кышкаса потэм апайёс бурдъяськизы, быгатонлыкъёссылы, асьсэ кужымзылы оскизы. Ижевске, Чайковские, Казанчие ӧтизы ини. Школаысь нылпиосын но кусып тупатэмммы потэ.