"Эшъяськон тугоко" нылкышно клуб литературно-музыкальной ӝыт ортчытӥз

Ужрад кутскиз «Слово земли» кинопроектъя культура удысын ужась Яна Шарафутдиноваен лэсьтэм «Выбор есть всегда» киноез учкон бордысен. Отын ӵапак нылпиослы лулчеберетэз, сям-йылолъёсты, кылэз утён мылкыд пыӵатонын семьялэн бадӟым интыез возьматэмын.

21-тӥ тулыспаллы, Анай кыллэн нуналэзлы, БСТ телеканал дасяз пӧртэм калыкъёсты возьматӥсь видеоролик. Отчы пыриськизы Выль Татышлыысь Эмиль Самигулов но Улысь Балтачысь Ева Гильмаутдинова. Ирина Самигулова, историко-культурной центрысь валтӥсь ӧнерчи, пусйиз пичи кизилиосты кузьымен.

Литературно-музыкальной ӝытэ ӧтемын вал Татышлы ёросысь удмурт гожъяськисьёс. Арибашысь Лилия Гараева, Уразгильдыысь Лена Исламова, Бальзюгаысь Ирина Кабипянова, Выль Татышлыысь Елена Нуриахметова но Ирина Самигулова, Бигинейысь Эльвира Гильманшина тодматӥзы чебересь чуръёсынызы.

Котькуд гуртысь кышномурт клубъёслэн ёзчиоссы дасяллям кылбуръёс, сценкаос, кырӟанъёс. Чузъяськизы Ирина Самигуловалэн, Татьяна Харисовалэн, Елена Миннигараевалэн, Флор Васильевлэн, Оксана Гильманшиналэн кылбуръёссы. Соосты быдэстӥзы Ева Гильмаутдинова, Эмиль Самигулов, Александра Гилимзянова, Эмилия Васильева, Маргарита Гараева, Татьяна Шайбакова, Альфия Медведева, Анастасия Даутова, Родион Рафиков. Ужрадэз шулдыр кырӟанъёсын Выль Татышлы клубен кивалтӥсь Юрий Нуриахметов, Улысь Балтачысь «Рябинушка», Калмиярысь «Инвожо», Выль Татышлыысь «Шулдыр ӝыт», Бигинейысь кышномурт ансамбльёс, Калмиярысь Надежда Гильманшина, Арибашысь но Бальзюгаысь Светлана Сабанчина но Гулина Младова сузэръёс шулдыртӥзы. Бальзюга гуртысь нылкышно клублэн ёзчиосыз дасяллям кык сценка: И. Самигуловалэн «Ой, висе» кылбурзэ чебер вераз но быгатыса возьматӥз Евгений Сабанчин, нош Римма Манапова Варвара внучкаеныз кырӟазы но, веразы но, кылбур но лыдӟизы, удмурт кылмес утьыны, соин вераськыны бурдъязы.

«Эшъяськон тугоколэн» вуоноез пумиськонэз сӥземын луоз удмурт клублэн пичи юбилеезлы. Ӵапак вить ар талэсь азьло кутскиз со ужаны.
Туспуктэм Алексей Самирзяновлэн.