«Чакара» – 2020

Коронавирус вӧлмемен сэрен, бадӟым ужрадэз ортчытыны ӧз луы. Озьы ке но со мукет сямен радъяськиз. «Камсьӧр огазеяськонлэн кивалтӥсез Ф. А. Чибышева но ёзчиосыз асьсэос поталлязы Удмуртилэн палэназ улӥсь удмуртъёс доры. Озьы соос вуылӥзы Башкортостанысь Янаул, Татышлы, Калтасы ёросъёсы, Татарстанысь Кукмор ёросэ, Марий Элысь Бадӟым Карлыган черкогуртэ, Свердловск, Тюмень, Челябинск, Киров улосвылъёсы. Отысь фольклор коллективъёслэсь кырӟан-веранъёссэс, эктонъёссэс видеое уськытъязы но б҅ӧрысьгес вотэс бамъёсы пуктылӥзы. Вань мылкыд карисьёс со съёмкаосты учкыны быгатӥзы.

Кылем арын ик «Пичи Чакара» фестиваль но радъяны чакламын вал. Таяз ужрадэ пыриськыны школаосысь пиналъёслэн фольклор коллективъёссы дасяськизы. Соос сярысь бичет но печатламын вал ни. Ужрадэз нош ик чакламъя ортчытыны ӧз пӧрмы. «Камсьӧр удмуртъёс» огазеяськон озьы ик регионъёсы ветлыса, коллективъёслэсь быгатэмзэс учкылӥз, фотовидеосъёмкаос лэсьтылӥз, ансамбльёслы кузьымъёс сётъяз.

Валамон, огазе люкаськыса ужрадэ пыриськонлэн пайдаез но кужымез бадӟым. Нош улон-вылон чаклам сценарийёсты куддыръя тӥя, сура-пожа. Сыӵе шуг-секытъёсты вормыны дась луыны кулэ. «Чакара» фестиваль со «могӟетэз» вормыны быгатӥз.