«Проект мынэсьтым мылкыдме бугыртӥз»

- Проектэз республикаысьтымы Граждан обществолы юрттэт возьматонъя фондэн ӵош Булат Юсуповлэн киношколаез но Башкортостанысь Кинематографистъёслэн союззы радъяло. Сое быдэстыны Башкортостан Республикалэн Тӧроезлэн грантэз сётэмын. Та проект 2019-тӥ арын ортчем «Слово земли» кинофорумлэн емышез луэ. Со Башкортостанысь калыкъёслэсь кылзэс, культуразэс, сям-йылолъёссэс утьыны но азинтыны юрттэ.

2020-тӥ арын Башкортостанысь калыкъёслэн кылъёсынызы 35-лэсь трос кино уськытӥзы. Соосты «Слово Земли/Онлайн» международной цифровой проектъя дасязы. Отчы 18 - 65 аресъем адямиос пыриськыны быгатӥзы. Со понна соослы кинопроектэнызы заявка келяно вал.

Проектэ Москваысь, Санкт-Петербургысь, Ямало-Ненецкой автономной округысь, Челябинск улосвылысь, Турциысь, Испаниысь но Башкортостан Республикамылэн пӧртэм сэрегъёсысьтыз 140-лы матэ заявкаос вуизы. Соос пӧлысь 80 устооссэ бырйизы. Собере проектъёслэсь авторъёссэс Булат Юсуповлэн киношколаяз пӧртэм кылъёсын сценариос но кинофильмъёс дасяны дышетӥзы. Проектэ пыриськисьёс башкир, ӟуч, бигер но удмурт кылъёсын кинофильмъёс сяна, 50 сценариос гожтӥзы. Соослы тодмо кинематографистъёс юрттӥзы.

- «Слово Земли/Онлайн» проект мынэсьтым мылкыдме быдэсак бугыртӥз. Зэм, нырысь со борды кышкасагес кутски. Но Булат Юсуповлэн школаяз ужасьёс сыӵе мылкыдэз ӝог тӧлӟытыны быгато, аслад кужымедлы оскон пыӵато. Соос ӟеч тодо, кыӵе шуг-секытъёсын пумиськыны быгато кутскись сценаристъёс но режиссёръёс. Соин котькуд дыре ужмылэсь ӟечлыксэ ӝутон сярысь сюлмасько.

Проект мон понна трос выльзэ, тунсыкозэ усьтӥз. Нырысь ик дышетски сценариос бордын ужаны. Со сяна, валай, куд-ог малпанъёсме быдэстыны быгато шуыса. Булат Юсуповлэн киношколаяз ужасьёслы бадӟым тау шуисько милемлы трос выльзэ сётэмзы понна. Туж тунсыко вал режиссёрлэсь «Визит» сценариезлэсь люкетъёссэ эскерон. Вебинаръёс но малпанъёсмес быдэстонэ бадӟым вамыш лэсьтыны юрттӥзы. Соин ик туннэ мон шуисько: «Асьтэлэсь кужымдэс киноиндустриын эскеремды потэ ке, кышкатэк вамыштэ Булат Юсуповлэн школаяз».

- Кинопроект сярысь верамзы бере, мынам син азям пуксиз таӵе суред: туннэ тросаз семьяосын нылпиос анай кылзэс вунэто яке солэсь воксё возьдасько. Со удмурт семьяосын гинэ герӟаськемын ӧвӧл, башкиръёслэн но, бигеръёслэн но та выллем сюлмаськонъёссы вань. Табере тросэз ӟуч но англи кылъёсты кулэен лыдъяло. Нош нылпиослы вордскем кылзэс гажан мылкыд пыӵатон сярысь нырысь ик анай-атайлы сюлмаськоно. Таӵе социальной ролик пыр мон аслэсьтым малпанме возьматыны тырши.

Социальной ролик ӟуч но удмурт кылъёсын дасямын. Отын пичи ныл азьын бадӟым ужпум кылдэ: солы песяез удмурт кылэз но культураез гажан мылкыд пыӵатон сярысь сюлмаське, нош анаез, городын удмурт кыл кулэ уз луы шуыса, нылзэ солэсь утьыны тырше. Кызьы азинтӥськоз пичи ныллэн улон сюресэз? Сое тододы роликез учкыса.

- Ёросысь культурая дворецын ужасько бере, актёръёсты быръён секытэн ӧз сётӥськы. Соос пӧлысь котькудзы быгатыса, вань сюлэмзэс сётыса шудӥзы. Татышлы ёросысь Петропавловкаысь Ирина Минлиаскаровалэсь (Унябей песяй) шудэмзэ учкыса, кылсярысь, тросэз синвуаськозы, дыр. Мукетъёс но зэмос актёръёс выллем адскизы, соослэн анай кылзэс утьыны тыршемзы, со понна сюлмаськемзы шӧдӥськиз. Оскисько, социальной ролик учкисьёсты но кылдэм югдур пумысен мур малпаськонэ уськытоз шуыса.

- Одӥг социальной ролик дасян понна зэмзэ ик трос адямиослы вазиськоно луиз. Туннэ тау карон кылъёсме верасько ёросысь культурая управленилы, культурая дворецын ужасьёслы, Татышлы ёросысь Калмияр гуртысь Елена но Ринат Зидымышевъёслэн семьязылы, Татышлы ёросысь Выль Татышлы школаысь исторической музеен кивалтӥсьлы З. П. Зайнуллиналы, актёръёслы, семьяелы. Ми одӥг бадӟым командаен ужамы. Оскисько, соослэн тыршемзы юнме уз луы. Социальной ролик анай кылмес но культурамес утёнэ бадӟым вамыш луоз. Нош мон понна – сценаристлэн но режиссёрлэн ужаз нырысетӥ тубат.