Пумиськон, эшъяськон но задор мылкыд

Дасэтӥ шуркынмонэ Татышлы ёросысь Улысь Балтач культура юртын «Эшъяськон выж» регионъёс куспысь этно-фестиваль ортчиз. Со «КЛУБ’ок XXI века» республика конкурс улсын радъяськиз. Соин ужрадэз учкыны, дунъяны Уфаысь куноос – республикаысь Калык творчествоя центрысь информационно-аналитической ёзэтэн кивалтӥсь Эльмира Ямлиханова но клубъёсын ужан методикаосъя валтӥсь ӧнерчи Виктория Мухамадеева – вуизы, озьы ик БР-ысь удмуртъёслэн НКЦ-енызы кивалтӥсь Салимьян Гарифуллин, Татышлы ёрос кенешлэн секретарез Радик Рахимов, ёросысь культурая управлениен кивалтӥсь Альфия Шайнурова, удмуртъёслэн историзыя но культуразыя центрзылэн валтӥсь ӧнерчиез Ирина Самигулова, Улысь Балтач гурт поселенилэн администрациеныз кивалтӥсь Эдуард Рахимзянов, Улысь Балтач школалэн директорез Людвиг Зидымаков пыриськизы. Куноосты Бигинейын, Юг шур выжын, пумитазы.

- «Эшъяськон выж» ортчытон сярысь малпанэ кылем арын ик кылдӥз. Сое удмурт гуртъёсысь нылкышно клубе ветлӥсьёсын ортчыто шуисько вал. Туэ со эшшо но паськыт пӧрмиз. Фестивалез ортчытыны удмуртъёслэн историяя но культурая центрзы юрттӥз. Бускель ёросъёсысь куноосты ӧтён ужъёсты Ирина Муллаяновна Самигулова быдэсъяз. Со сяна, юрттӥськизы культура юртын ужасьёс Анна но Дмитрий Тархановъёс, Тамара Мухарамова, Эльфина Туктакеева, Лариса Гарифьянова, «Легезьпу сяська» нылкышно клубе ветлӥсьёс, Татышлы ёросысь культурая управление, отысь методкабинетын ужасьёс. Бадӟым тау ваньзылы, - вера Улысь Балтач культура юртэн кивалтӥсь Ирина Шайхлисламова.

Этно-фестивале вуэмъёс понна культура юртын адӟытонъёс радъямын вал. Улысь Балтач школаысь дышетӥсьёслэсь Алексей Шагиевлэсь но Ирина Шакировалэсь ужъёссэс котькин паймыса учкиз. Фойеын интыяськем удмурт коркан мылкыд карисьёс туспуктэмъёс лэсьтыны быгатӥзы. Татын ик удмурт дӥськут вуронъя мастер-класс радъямын вал – Улысь Балтачысь кибашлы кышномурт Аниса Минияхметова ужзэ возьматӥз. Со сяна, пӧртэм-пӧртэм туспуктэмъёсъя адӟытонъёс дасямын вал.

«Эшъяськон выже» удмуртъёслэн историяя но культурая центрзы бордын кылдэм удмурт нылкышноослэн клубъёссы азинлыко пыриськизы – Татышлы ёросысь Улысь Балтачысь, Кызыл-Ярысь, Бальзюгаысь, Вязовкаысь, Выль Татышлыысь, Калмиярысь, Уразгильдыысь, Арибашысь, Янаул ёросысь Банибашысь, Вуж Варяшысь, Нефтекамскысь нылкышно клубъёсы ветлӥсьёс сяна, Ермекей ёросысь Купченеевоысь «Зангари», Свердловск улосвылысь Дегтярскысь «Италмас» но Первомайский посёлокысь «Инвожо» удмурт фольклор ансамбльёс но вуизы. Ваньзы соос фестивале крезьгур кузьымъёссэс ваиллям. Зал тыр люкаськем калык соосты туж шуныт пумитаз. Ирина Самигулова нылкышно клублэн кылдэменыз но уж сюресэныз тодматӥз. Собере «Мынам садысьтым сяськаосы» (ИКЦ-ен ялэмын вал) туспуктэмъёсъя конкурслы йылпумъянъёс лэсьтӥз. Нырысетӥ степенё дипломъёслы кузё луизы Юлия Кайранова (Улысь Балтач) но Ирина Кабипянова (Бальзюга), кыкетӥ интылы – Индира Шайсламова (Петропавловка) но Алиса Рахматуллина (Вязовка), куинетӥ интылы – Лилия Гараева (Арибаш), Вероника Галлямшина (Вуж Варяш), Регина Фазлтдинова (Уразгильды).

Этно-фестивальын удмурт крезьгуръёс но башкир, бигер эктонъёс, ӟуч такмакъёс, кырӟанъёс одӥг бадӟым бугоре биниськизы. Ужрадын Улысь Балтачысь данъяськымон адямиосын но тодматӥзы: та нуналэ трос шуныт кылъёс верамын вал Рим но Альфия Баймиевъёслэн тупаса улӥсь семьязы сярысь. Вераны кулэ, соос «Светӥ дорын куноын» телепередачае но вуылӥзы ни. Озьы ик сцена вылэ Аниса Минияхметоваез но ӧтизы. Удмурт дӥськутъёс вурон сяна, Аниса Шариповна башкир, бигер эктон дэремъёс но вуре. Бадӟымъёслы, пичиослы дэремъёсыз туж усто пӧрмо.

Этно-фестиваль пумиськытӥз, эшъяськытӥз, задор мылкыд кузьмаз. Ужрадэ вуэмъёс выльысь «эшъяськон выжын» адӟиськыны кенешизы.

Миляуша БУЛАТОВА.

Татышлы ёрос.