Калык праздник шулдыръяськыны ӧтиз

Кык арлы одӥг пол татышлы музъемын, Россия Федерациысь но Башкортостанысь сӥё-дано кырӟасьлэн, Татарстан Республикаысь калык артистлэн Салават Фатхутдиновлэн вордӥськем Аксаит гуртаз, 2006-тӥ арысен «Вордӥськем гуртэ» калык праздник радъяське. Республика ужрадэ уно калык люкаське. Сое дасяны но ортчытыны трос кужымзэ понэ ёрос администрация, юрттэт возьмато БР-ысь Культурая министерство, республикаысь Калык творчествоя центр но «Салават» театр-студия. Туэ празднике республикаысь Балтач, Бурай, Калтасы, Караидель, Краснокама, Татышлы, Туймазы но Янаул ёросъёсысь, Удмурт Элькунысь, Пермь шаерысь, Свердловск улосвылысь кырӟаны усточи куноос вуизы. Со сяна, сцена вылын Башкортостанысь но Татарстанысь эстрадая кизилиос «пиштӥзы». Учкисьёслы удмурт кырӟанъёссэс кузьмазы Удмуртиысь кизилиос Алёна Тимерханова, Иван Котельников но Николай Анисимов, Татышлы ёросысь Выль Татышлыысь «Шулдыр ӝыт» калык ансамбль, Улысь Балтачысь «Ӧрӟи» вокалъя ансамбль но Куеда ёросысь Бадӟым Гондырысь «Тюрагай» фольклорно-этнографической ансамбль. Та ӝытэ куноосты калык коркаосын но юртаосын пумиталлязы, ческытэсь пӧръёсын куноязы. Ужрадэз усьтыса вераськизы Татышлы ёрос администрациен кивалтӥсь Рушан Гараев, БР-ысь Культурая министерствоысь социокультурной ужъёсъя ёзэтэн кивалтӥсь Альбина Юлдашбаева. Со республикаысь культурая министрлэсь Амина Шафиковалэсь ӟечкылан гожтэтсэ но вуттӥз. Озьы ик калыклы ӟечкылан кылъёсын Салават Фатхутдинов вазиськиз.

Праздникын азьвыл ялӥськем «Лучшая деревня-2016», «Лучший образцовый дом» ёрос конкурсъёслы но «Лучшее национальное подворье» конкурслы йылпумъянъёс лэсьтӥзы. «Лучшая деревня» ним сётэмын Артаул гуртлы. Кыкетӥ конкурсын вормонлы кузё луизы Улысь Балтачысь Юлия но Алик Кайрановъёс. Конкурсын вормисьёслы дуно кузьымъёс сётӥзы. Йӧскалык коркаосты но юртаосты дасянъя конкурсын вормисьёсты БР-ысь Культурая министерстволэн дипломъёсыныз но ёрос администрацилэн кузьымъёсыныз пусйизы. Выль Татышлы но Калмияр гурт поселениосын дасям удмурт корка «За большой вклад в приумножение культурного наследия и духовного богатства удмуртского народа» номинациын вормисе потӥз, Улысь Балтач гурт поселениен дасям ӟуч корка – «За преданность русским традициям, гостеприимство и оригинальный творческий подход» номинациын.

Шулдыр концерт уйшорозь кыстӥськиз. Ужрад паймымон яркыт фейерверкен йылпумъяськиз.