Анайлы гожтэт

Чырткем, мамае! Ӟечбур, мусое, мусолэсь но мусо анае! Тани нош ик пукси гожтыны тыныд гожтэт.

Ми доры вуиз тол. Татчыoзь ай вань калыкез шумпоттыса возиськиз чебер, шундыё, шуныт но кӧс сӥзьыл куазь. Нунал вакчияз, уйёс кузёмизы, дыр сюриз дорысьтымы тыныд ивор ыстыны. Тодӥсько, та гожтэтэз дорад нокин уз вутты, озьы ик ӝӧк вылам кыллёз, но оскисько, иворъёсме тодытэк уд кыльы.
Мусо анае, мон сярысь чик но эн сюлмаськы, мынам ваньмыз умой. Улон ог сямен радъяське. Бакча будосъёсмы туэ туж удалтӥзы. Тужгес но шумпоттӥзы слива, сутэр, эмезь, улмо. Картошка но ӵужкушман тожо чебер будӥзы. Огреч ӧжытгес вал, но тырмыт. Мынам но тынад нунокъёсмылы толбытлы бакча емышъёсмы окмозы. Вань сылалтэмъёсмы но вареньняосмы ӝик- ӝик банкaосы пытсамын но гулбечамы интыямын. Оскисько, та ивор тонэ шумпоттоз, азьвыл но уго семьяме бакча сиёнъёсын куноям гинэ ӧвӧл, ачид тыбыр сьӧрад котомкаен ми доры Ижкаре вуттылӥд, тонэ нокин со сярысь курись-косӥсь ке но ӧйвал. Кӧня курылӥ, озьы курадӟыса эн ветлы ни, ачим ваё шуылӥ, ноку ӧд кылзиськылы. "Асьтэос ӵем уд бертылӥське, адскеме потӥз" - шуылӥд. Со вал коньдонъя туж секытэсь 90-тӥ аръёсы. Ачим но, нылпиосы но тыныд со понна музъемозь йыбырттӥськомы.
Табере со сямыд - нылпиослы Ижкаре бакча сиён нуллон - мыным сётӥськиз. Эстафетадэ басьтӥ, я, мынам коть машинае вань, тыбыр вылам нуллонэз ӧвӧл. Машинае но бен тынад юрттэменыд басьтэмын. Таиз понна но уг жадьы тау карыны.
Мусо анае! Лымы усемлэсь азьвылгес бакча кенер вӧзтӥмы ог 8 ар талэсь азьло ӵош мерттэм кызьпуосмы, льӧмпуосмы, кызъёсмы но сливаосмы вӧзтӥ ортчи. Соосын тон сямен ик вераськи, чебер но юн будыны кури. Тужгес яратоно кызьпуэд, усьылыны вуымтэ ӵуж куаръёсыныз шильыртыса, тыныд салам сипыртӥз, мукетъёсыз но будосъёсыд шудо-буро улон сӥзизы, сокем соосты яратӥд уго.
Али но син азям кызьы тон кошкон азяд котькудӥныз писпуосыныд берпуметӥзэ шуыса вераськид, вешад. Нюромем синъёсыд гинэ веразы, кыӵе секыт вал соосын люкиськыны. Туэ писпуосыд эшшо но чеберскизы, соос котьку мыным тонэ тодазы вайыто. Салам тыныд соослэсь, салам, дуно но яратоно анае!
Салам тыныд Саша пиедлэсь, Таня кенэдлзсь. Соос тожо огсен уло, нылпиоссы эскерыны, мар но со юрттӥськыны вуыло.
Мусо анае! Берло дыре кӧлэме ик уг луы. Изьыны выдӥсько но вань улонэ син азям. Тани мон ньыль арес дыръям пересь нэнэй но дядяй (песятай) дорын тонэн ӵош куноын. Ӝыт корка пушмы сӥялскиз но нэнэй кортгурзэ эстэ. Соку ик шуныт луэ. Мон лӧптыса ваньдылы куинь парсьпиос сярысь выжыкылэз мадисько. Огполын уг тырмы, кӧня ке улыса нош сое ик верасько, собере мукет выжыкылэз. Тӥ монэ выльзэ но выльзэ выжыкылэз вераны лӧпкытӥськоды. Мыным со ик кулэ - мадисько но мадисько.
Со дыръёсме тодам вайыса, али воксё паймисько: кызьы тон, мама, ляб синмо, школаын нырысетӥ классын кык арня гинэ дышетскем мурт, нырысетӥ парта сьӧрын пукыса но доска вылысь гожтэмез адӟисьтэм маке, улытозяд одӥг книгаез но лыдӟымтэ мурт, кытысь тон сомында выжыкылъёсты, удмурт мадиськонъёсты, удмурт кырӟанъёсты тодӥськод вал!? Эшъёсыд но троссэ кырӟанъёстэ кылылэммы но ӧй вал шуылӥзы. Туж ушъяллязы тонэ со понна.
Букваосты тодӥсько ини, лыдъяме-чотаме, аслэсьтым фамилиме гожтэме луэ ини шуыса школае ветлэмысь дугдӥд но ачид колхозэ ужаны пырид.
Пичи дырысеныд ужаны кутскемед, улонлэсь шӧгзэ-кузьытсэ дурыныз веръямед сярысь радиоверан кылдытон сярысь малпанэ малпанэн ик кылиз. Луонлык вань вылысь номыр ӧй пӧрмыты, дыры-а ӧз шедьы шуод. Со сярысь ӵош ужам эшъёсыд, анай-атаед но ми гинэ, кык пиосыд, тодӥськом. Озьы уго пӧрмиз, сапожник без сапог шуэм выллем.
Со ласянь мынэсьтым но аламагес ассэ атаед возем. Война бере колхозлэн председателез луыса ужакуз, бригадирды 8-тӥ Мартлы кузьым кышет сётыны чаклалля вылэм. Нош атаед тонэ ӵектэм списокысь ӵушылэ вылэм. Озьы со калык умойтэм малпамзылэсь кышкаса карылэм. Кызьы, пӧй, аслад нылыдлы кузьым сётод!? - малпалляз, вылды, песятае. Эшъёсыд чебер кузьым кышетъёсын, нош тон вуженыз. Мар карод!? Зар-р гинэ бӧрдод но тӥни...
Гажано анае, нош кӧня пӧртэм молитваосты тон тодскод вал! Эшъёсыд но ми, кык пиосыд, бадӟым букваосын гожъяса молитва кылъёсты сётӥськом вал дышетыны шуыса, яке шара лыдӟиськом но кык- куинь пол верамен ваньмыз йырад пыраклы кыле ни вал.
Мусо, яратоно, гажано мамае! Мон тыныд туж шер вералляй та кылъёсты улэп дыръяд. Малы? Али малпаськисько со сярысь, вуисько сыӵе валанэ: тон будэтӥд милемыз огнад, ачид ик анай, ачид ик атай. Нокыӵе нуныяськон-чупаськонъёслы воля сётэмын ӧйвал. Со понна нырысетӥ интые котьку пуктылӥд юртъер котырын ужан-юрттӥськонэз. Улонын ваньзэ быгатoно шуылӥд. Ӧд люкылы: таиз кышномуртлэн, таиз пиосмуртлэн ужез шуыса. Ваньзэ лэсьтылӥм огазе.
Мусо анае, тау тыныд нылкышно ужлы но дышетэмедлы. Тыныд луыса, мон пичи дырысеным быгатӥсько пӧраськыны, керттӥськыны... али ваньзэ уг лыдъя-вера ни, тон сое ачид но ӟеч тодӥськод. Чик но уг возьдаськиськы солэсь, уго
пӧраськыны быгатэме юрттӥз мыным студент вакытъёсам общежитиын улыкум. Куинь-ньыль комнатаосысь эшъёсылы мон повар луыса ужай. Нош тросэз столовое ветлоно луылӥзы.
Ножовка, тӥр но молот киям возьыны песятае дышетӥз, нялтас вераса, солы но бадӟым тау.
Та быгатoнъёсылэсь пайдазэ школаын дышетскыкум одӥг конкурсысен но шӧдӥ: дасо пала пиосты картошка паланы косӥзы. Кыӵе соос монэ паймытӥзы... быгатымтэенызы! Анайёссы соосыз, шӧдӥське, та ужлы чик дышетӥллямтэ.
Яратоно анае, мон уг жадьы тонэ тау каремысь будэтэмед, утялтэмед, сюдэмед, яратэмед понна. Пыраклы тодам кылиз мон пичи (ог 4 арес вал-а меда соку) дыръя кыӵе ке но ужен Пичи Пурга райцентрамы ветлэммы. Толалтэ, туж кезьыт куазь. Малы ке сылӥськом ульча шорын. Мон гын сапеген, пыдъёсы озьы ке но кынмизы, вӧсь луэмелы чидатэк бӧрдӥсько. Тон, кема малпаськытэк, пыдъёсме сапегысь поттыса, бӧрсьысь бӧрсьы гольык киосыныд но ымтӥд шокаменыд шунтыны тыршиськод. Мырдэм.но кызьы шунаны кутскеме бере гинэ ганяк кариськид. Малы меда асьмеос соку лавка пушкы но ӧм пыре? Вал ук, дыр, соос отын, уг тодскы ни.
Самой со нуналэ йырам сыӵе валан, я оскон кылдӥз: тон мон понна ваньзэ-ваньзэ лэсьтод, тон монэ юн-юн яратӥськод. Ачим но тонэ туж зол яратӥсько шуыса отысен нырысьсэ валай.
Нош тодӥськод на- а Кечтака (Егорово гуртмылэн удмурт нимыз) но Брангурт сюрес вискын йыромеммес? Ма кызьы, пе, уд тоды, юнме гинэ юасько.
Озьы ик толалтэ вал со. Мон висьыны уси, кӧтме олокинэз-маиз туж висетыса позыръя-бералля. Тон уйин 4 часын вал кыткид но нуиськод монэ Брангурт эмъюртамы. Уйин трос лымы уськытэм, сюрес пытсаськем выллем луэмын, номыр уг адскы. Валмы сюреслэсь палэнэ кожем, со сюрестэм азьын кӧт вылозяз лымы пушкы выемын, потэмез уг луы. Вот курадӟон ке курадӟон сюриз тыныд соку!
Нырысь валлы сюрес лёгад, солы лымы могӟетысь капчигес потыны мед луоз шуыса. Я, валмы ӧжытак вырӟе, лёгамтэ интые вуыса нош вые. Собере валэз дӧдьыысь юскид, ачиз сюресэз мед шедьтоз шуыса, серметтӥз кутыса сьӧраз ветлӥд.
Сюрес тани татын луыны кулэ кадь. Азьпалан, кыдёкын ик овӧл ни куд-ог Брангурт коркаосын тылъёс ӝуатскемын ини, нош сюрес уг шедьы. Шат татчы ик кыкнамы но чатралом ини шуыса, вӧсяськыны шӧтад.
Будэмъям эшъёсы азьын возьыт луылӥз Инмарлы мултэс оскеменыд валлин. Школаын милемыз дышетӥзы Инмарлы осконтэм вылысь. Вождэ эн вайы со понна, пинал муртлэн янгышез со.
Ӧд, инкуазь шуг-секытлы, кышканлы, пеймыт уйлы соку ӧд сётскы, утчад, шедьтӥд, кытчы кулэ вуттӥд. Тау тыныд, кык пиостэ огкадь зол яратӥсь дуно адямие.
Мусо анае! Одӥг гожтэтын ваньзэ уд вера. Куддыръя мон тыныд ӧч но карылӥ. Укылтэм но вал, тамак кыскылӥ, курытсэ юылӥ. Нош огпол мар верамме валатэк тонэ юнме шорысь туж юн обӥдэ уськытыны шедьтӥ. Со понна мон тынэсьтыд соку ик прощение кури ке но, али но со янгышаме пумысен сюлэмы висе.
Огезлы шумпотӥсько: совхозамы пудо вордонын ӟеч ужамед профсоюзэн адӟытэк кельтэмын ӧй вал. Вить оло куать пол дунтэк шутэтскылӥд санаторийёсын. Со понна Совето Союзмылы бадӟым тау.
Анае, мусое! Кнопкаё телефондэ возисько. Шер ке но, куддыръя отчы эшъёсыд жингырто. Монэн верасько но анайдэ кылэм кадь потӥз шуо. Мон вераськонмес йылпумъяса соослы тынад ӵем вераллям кылъёсыныд вазиськисько, кылбур чуръёсыз кадь соосыз дышетӥ ини:
Нуналыд каньылэн мед ортчоз!
Чаклам ужъёстэ мед быдэстод!
Семьядэ яратон мед шунтоз!
Инмаред шудбур мед кузьмалоз!
Эшъёсыныд вераськондэ котьку та кылъёсын йылпумъялляд. Аслад улонад но озьы ик медло. Оскисько, Инмаред вӧзад, тон солэн бурд улаз, со тонэ котьку утёз, кызьы тон милемыз утид, вордӥд, яратӥд.

Туспуктэм интернетысь басьтэмын.