"Ӟазегдэс сиыны тазалыкты мед луоз"

Тросэзлэн тодазы на, дыр, ӟазег утисьёс айы но одӥг яке кык мумы ӟазег тол потто вал. Вазь тулыс мумы ӟазегъёс пузаны кутско. Соослэсь пузан кудызэс ӵем дыръя коркан ӝыжолын возё вал. Пичиослы тунсыко но, кышкыт но вал. Малы ке шуоно, ӟазег пузаны корка пыре вал, нош пукыкуз азбаре туж шер поталля. Соку со вӧзтӥ ортчыны шедьтӥськод ке, одно ик пыддэ чепыльтыны турттоз. Пизы потэм бере но айы ӟазеглэсь пегано луэ вал.

Туала вакытэ ӟазег поттыса нокин курадӟыса уг улы ни, инкубаторе яке мукет вузан интыосы мыно но басьто. Тросэз уксёен басьтэм ӟазегпиоссэс асьсэ коже утё. Куд-ог кузёос азьвыл кадь ик айы но мумы ӟазег потто, собере соос гужембыт «сюр» пиоссэс асьсэлэн кожаса сьӧразы нулло. Амало адямиос дышиллям ни айы ӟазегез огназэ тол поттыны. Паймоно кадь, но со анайлэсь рользэ туж умой быдэсъя, пе.

Дырыз вуиз ке, ӟазегпиос тырмыт ке будэмын ни, ӟазег ишкон веме ортчыто. Отчы кузё кышно бускельёссэ, ӵош ужась эшъёссэ ӧте.

Нырысетӥ ишкем ӟазегез ӵушкаса, пушсэ поттылыса, миськыса, кузё кышнолы сёто. Малызэ валаськоды, луоз. Кузё кышнолэн аслаз вемеын ӟазег ишкыны дырыз чик уг луы. Со ужасьёссэ сюдыны-сектаны сюлмаське. Мунчоын, азбарын ужъёс бырем бере, ӟазегъёсты ошмес дуре гылъяны нуо. Кин ке та ужез азбарын ик быдэстэ.

Ужзы йылпумъяськыса, ваньзы корка пыро. Ужасьёсты ӝӧк вылын возьма ни ческыт сиён – пӧзьтэм ӟазег сӥль но солэн лымаз пӧзем номырин ӵошатонтэм ческыт ӝук. Кышномуртъёсты, «ужамды кадь сие» шуыса, куно каро. Азьвыл сӥзьыл шыд сиыны ӧтчало вал, али пудо вандон веме бере ик ужасьёсты сӥлы каро.
Ӟазег ишкисьёслы котькудӥзлы нимаз йыр, пыд, ӵемон, бурд сёто. Вемечиос кузёослы сӥзёнъёссэс верало: «Вуоно арын но ӟазег вордыны мед гожтоз, нош туэзэ сиыны тазалыкты мед луоз».

Туспуктэмъёс лэсьтэмын Татышлы ёросысь Выль Татышлы но Уразгильды гуртъёсын ӟазег ишкон вемеосын.