Сӥзьыл кисьтондэс ортчытӥды ни-а?

Нош сӥзьыл кисьтонзы татышлаослэн азьвыл Октябрь праздник вакытэ, 7-тӥ ноябрь котыр, ортче. Породэн ветлӥсьёс (атай палтӥ ӵыжы-выжыосын) семьяысь семьяе шур быземъя вылысен улэ кисьтон карыса ветло, сиё-юо, кулэмъёсты буре ваё, тулыс кисьтонтэк кисьтон эн карытэ ни шуыса кулэмъёслэсь куро. Ӝӧк вылын одно ик луыны кулэ табань, пӧртэм пушкесэн ныроос (песочной ыльнянен пыжем калягалэсь, кӧжылэсь пирожки), шаньги, перепеч, курыт юон. Та йылолэз ум вунэтӥське но арлы быдэ ортчытӥськом ке но, капчиятыны тыршиськом. Кылсярысь, туж ӧжытэз ветлэ на породэн, ӵемысь асьме семья куспын гинэ ортче сӥзьыл кисьтон. Азьло кисьтонлы кулэм ӵыжы-выжыослэн лыдзыя нимысьтыз сюсьтылъёс дасяло вылэм (пичи басма кесэгез сюсьтылэн зыраса, чӧльы зӧкта луэ вылэм со). Али куд-ог семьяослэсь гинэ кулэмъёслы куяськыкузы сюсьтыл ӝуатэмзэс кылэм вань. Сӥзьыл шай вылэ но туж ӧжытэз ветлэ.

7-тӥ ноябрь котырын Бурай ёросысь Алтау гуртын ортче сӥзьыл куриськонзы. Та гуртын улӥсь Виктор Мардановлэн верамезъя, азьло та сэбед дыръя гуртын улӥсьёс Калтасы ёросысь Кургак, Качак палан улӥсь ӵыжы-выжыоссы доры куное ветло вылэм. Со сямзы ышемын ни, соин асьсэ семьяенызы ӟазег, ӵӧж, ыжпи сӥлен ӝук пӧзьтыса, курисько. Нош кисьтонэ татын атас вандо, кеньырен шыд пӧзьто. Со куриськон бӧрсьы арня ортчыса луоз.