Зверево гуртысь Анастасия Хазимарданова «ЧЕБЕРИНКА-2020» конкурсэ пыриське

"ЧЕБЕРИНКА 2020" - пинал нылашъёслы чеберлыкъя но устолыкъя нырысетӥез йӧскалык конкурс! Ужрад 6-16 аресъем чеберайёс понна ортчытӥське. Соос асьсэлэсь быгатонлыкъёссэс бадӟым сцена вылын возьматыны мед быгатозы шуыса.

«Конкурс радын нылъёс понна киужъёсъя но дефилея мастер-классъёс, фотосессиос, дизайнеръёсын пумиськонъёс луозы. Конкурслэн берпуметӥ люкетэз - финал - арлэн пумаз ортчоз. "Чеберинка 2020" конкурс куинь арлыдъем категория ортче:

Та вакытэ конкурсэ пыриськыны мылкыд карисьёслэсь вазиськонъёссэс люкан уж мынэ. Анкета-заявкаосты [email protected] электро почтае 5-тӥ куарусёнозь келяно.

Анастасия ас сярысьтыз тазьы гожтэ: "Ӟечбуресь! Мынам нимы Настя, нош монэ дорисьёс пичи дырысен ик яратыса «Насьпок» шуо. Туэ мыно 9-тӥ классэ. Туж яратӥсько дышетскыны, выльзэ тодыны. Соин ик тыршисько 5-лы гинэ дышетскыны. Кык ар талэсь азьло йылпумъяй музыкальной школаез, вокалэн заниматься кари. 8-тӥ классын ветлӥ вуриськонъя но робототехникая кружокъёсы. Районамы ортчись исследовательской ужъёсъя конкурсъёсы пыриськисько, призовой интыос басьтӥсько. Яратӥсько кырӟаны, суредаськыны, эктыны. Мон туж тунсыко нылаш. Мыным 15 арес ке но, капчиен шедьтӥсько сюлэмазы сюрес но одӥг кыл 4-5 арес пиналъёсын но, 30-40 арес апайёсын но, пересь песяйёсын но. Туж яратӥсько анай-атайме, Архип нимо вынме. Удмурт сямен вераськыны уггес быгатӥськы ке но, арлы быдэ ӵужайкае (озьы анайлэсь анайзэ нимасько) доры гуртэ бертылӥсько, соин ӵошен вераськиськом. Пепие (песяйме озьы яратыса нимасько) но удмурт сямен монэным вераське.

Тулыс но сӥзьыл куриськонъёс, кисьтонъёс, выль кенак пыртон, вордӥськем нуныез сектан, сюан, выль коркае выжон – вань та йылолъёс милям вирсэрамы пыӵамын, ум вунэтӥське, пересьёс пиналъёсты дышето.

Мон данъяськисько анай кылы удмурт шуыса, малы ке шуоно, удмуртъёс тыршисесь, ужасесь, лякытэсь но чылкыт сюлэмоесь!"