Кулэмъёсты буре вайыса

Малы ӵапак та нуналъёсы кисьтонэз карыны турттӥськом? Малы ке шуоно, соку палэнын улӥсьёс но бертыло, кулэмъёслы куяськыны мыныны быгато. Туэ палэнын улӥсьёс асьсэ понна мед куяськозы. Шай вылэ мыныны кык-куинь адямиен, маскаосын мынӥм ке, номыр уродэз уз луы, дыр. Кисьтонлэн аслаз радлыкез, аслаз сиён-юонъёсыз. Асьме палан тулыс но сӥзьыл кисьтонъёсын сиёнъёс пӧлы пыро калягаен (кӧжыен) ныро, табань, перепеч, шаньги, сӥньысэн вандылэм курегпуз, курег лым (Татышлы ёрос сямъя). Кисьтон дыръя пыжиськемез пуртэн вандыны уг яра. Таба зын поттыны, пуктӥськыны, ки сьӧрлань куяськыны, азязы уськытыны – таӵе кылъёсты кылоно луэ та йылолэз ортчытыку гинэ. Ышемын ӧвӧл на породэн ветлон – та ужрадэз атай палтӥ ӵыжы-выжыосын ортчытон (кин отчы пыре, одно ик тыршо нырысетӥ кисьтон ортчытэм коркан кадь ик дасяськыны, доразы ӧтьыны).
Кисьтон ортчем бере ӵуказеяз мынӥськом шайвылэ. Отын куяськиськом, буре ваиськом, кулэм ӵыжы-выжыосмылэсь шай котырзэс сузяса кельтӥськом, сӥзьыл кисьтонтэк кисьтон кароно медаз луы шуиськом.

Ӵектӥськом та темая Эстониын ужась егит тодосчилэсь Николай Анисимовлэсь та темая усьтэм лекцизэ учкыны: https://www.kirmus.ee/sites/default/files/2020-04/vid.mp4

Туспуктэм лэсьтэмын 2019-тӥ арын тулыс кисьтон дыръя Татышлы ёросысь Уразгильды гуртын. Породэн ветлон. Авторез: Николай Анисимов.