Дышетэ удмурт кылысь буёлъёсты буям курегпузъёс пыр

Кызьы кылдӥз меда таӵе мультфильм кылдытон сярысь малпан? Асьсэ мылкыд каремзыя-а, кыӵе ке коньдон утыса-а? Та нырысетӥез-а таӵе ужзы? Азьпалан луозы на-а таӵе ужъёссы? Вотэс пыр вазиськи Настялы но Сергейлы.
Настя. "Котьма лэсьтыны выриськом ке, нырысь ик асьме нылпиосмы сярысь малпаськом, мед удмурт кылын тунсыкъяськозы, гажалозы, данъяськозы но вераськозы. Нош со понна нылпиослы возьматыны но пыӵатыны кулэ, удмурт кыл улонэн ӵош азьлань вамыштэ, бере уг кыльы шуыса.
Малы буёлъёс вылэ дугдӥм? Туала нылпиос ваньзэ учко Ютубысь, милям нылпиосмы но пӧртэм ӧвӧл. Нылмы туж яратэ учкыны буёлъёс, букваос, пӧйшуръёс сярысь видеоосты, нош ваньмыз соос ӟуч яке англи кылын. Одӥг пол таӵе учыр вал: Ютубын испан кылын буёлъёсты возьматӥсь видео лэзиськем, нылмы сое учкыса пукем. Со нуналэ ик со вож буёлэз испан кылын вераны кутскиз. Та учырез чакласа вераны луэ, нылпиос туж чаляк адӟемзэс но кылэмзэс пелязы поно. Озьы малпам, удмурт кылын но буёл нимъёсты Ютубысь учкыны но дышетыны мед луоз шуыса".

Сергей. "Буёлъёсты дышетӥсь мультиклы финансирование ой вал, асьме мылкыдъя лэсьтӥм. Дыр сюриз ке, эшшо лэсьтысал на мукет дышетӥсь видео. Нылпиосмылы кельше соосты учкыны. Мукет ужъёсме луэ Ютубысь inviis каналысь учкыны. Лэсьтӥ "Кечпи но кион" удмурт калык выжыкылъя мультфильм, Мурӝол Underground-лы (Богдан Анфиногенов) "Udmurt Kach Ach Ach Ach" кырзанэзлы анимационной клип. Собере вань на Настяен ӵош дасям пластилинлэсь экспериментальной мультикмы. Со нимаське "Крестьян но вумурт", кудзэ кык арня куспын лэсьтим Эстониын егитъёслы финн-угор анимацияя мастер-классын".

Вераны кулэ, Сергейлэн шарж амалэн туспуктэмъёсты лэсьтон ужез но туж азинлыко мынэ. Берлоез лэсьтэмез - асьсэлэн семьязылы.

Удмурт литературной кылысь буёлъёс ваньзы камсьӧр удмуртъёслэн вераськоназы уг кутӥсько. Кылсярысь, бусӥр тусэз Башкириын курень шуозы, нош Удмуртиысь удмуртъёслэн курень буёлзэс ми палъёс льӧмпог шуозы, вань на ал, сур но алпри кылъёсмы, кудъёсыз пеймыт-горд, пурысь но лемлет тусъёсты возьмато. Пичи нылпиослы тунсыко луоз ӵошатыны литературной но асьмепал вераськон кылъёсысь буёлъёсты. Учкелэ но дунъялэ.