Пыжем курегпуз яке Быдӟымналэ курегпузэз буян сярысь

Котькуд ар шумпотыса дасяськиськом, дормес, юрт котырмес утялтӥськом, Быдӟымналэз вань куронъёсты чакласа пумитаськом, арлы быдэ курегпуз буяськом, ӝук пӧзьтӥськом, Быдӟымнал куриськон ортчытӥськом. Тӧдь туш бабай - та праздниклэн валтӥсь персонажез, кудзэ нылпиос чидатэк витё но юри со понна выль дӥськутсэс поныса кельто. Коркась корка курегпуз бичаса ветлӥсь нылпиосты но витёно, курегпуз сётэм сяна, соослы юри кампет басьтыса но дасяло удмурт нылкышноос. Кыӵе мусо кылӥське соослэн куспазы "мынам 10 курегпуз луиз ини", "тынад ӧжыт гинэ ай", "сояз коркан кампет но сётӥзы" шуыса вераськемъёссы. Жаляса верано, туэ ӵыжы-выжыосын ог-огзы доры но уз ветлэ, курегпуз бичасьёсты но анай-атайёссы уз лэзе, дыр. Но со сярысь вунэтоно ӧвӧл.

Али курегпуз буяны, чеберъяны магазинъёсын трос буёлъёс, наклейкаос вузасько. "Одноклассники" сайт пыр вазиськи пӧртэм интыосын улӥсь удмуртъёслы курегпуз буян рецептъёссэс юаса. Газетэз лыдӟисьёсын но соосын люкиськеме потэ.

Сергей Байдуллин, Янаул ёросысь Шудек гурт: Сугон кӧмез люкасько и курегпузэн ӵош пӧзьтӥсько".

Алена Булатова, Сургут город, ХМАО: "1. Вуштон пыр гордкушманэз поттӥськом но вуын курегпузэн ӵош пӧзьтӥськом, уксус ватсаськом. 2. Пӧзем тӧдьы курегпузмес вож турынъёсын (укроп, петрушка но мукет) биниськом, вылтӥз марляен юнматӥськом, уйлы кельтӥськом. 3. Буёл интые каркаде чайез но горд йыро кубистаез кутыны луэ".

Олег Попов, Удмуртия, Вавож ёрос, Выль Бия гурт: "Мамае солдат сяськаен (ӵуж ромашка) но буялля вал азьло, бичаськом ке. Туж чебер пӧрме вал".

Анастасия Вождаева, Ермекей ёрос, Купченей гурт: "Анаеным тазьы буяськом вал. Зверобой сяськаез вуын быректытыса ог дасо минут, вузэ кисьтӥськом дасям курекпуз вылэ, одӥг чечы пуньы сылал ватсаськом. Нош кинлэн пыжем курегпуз сиемез вань? Анае курегпузэз 4 минут пӧзьтэ вал, собере гуре пень пушкы ворсаса понэ вал, пӧрме дунне вылысь самой ческыт деликатес! Пень пушкын эгырез медаз луы, курегпузды пуштоз. Туннэ гинэ 21 курегпуз гурын пыжи, витиськомы правнукъёсмес, туж ярато".

Ольга Данилова (Самсонова), Екатеринбург кар: "Мон одӥг пол вуж шарфикен буяй вал. Бездыло вал ук азьло дӥсьёс".