Нош тӥ тыл вылтӥ тэтчаськоды-а?

Шуныт тодэ ваёнъёс кельтӥсь вакыт

Вӧй йылолэз келям бере Быдӟымналэз возьманы кыле! Та нуналэз пиналъёс курегпуз сиён понна, оло, выль дэрем басьтон понна тужгес витё. Син азе пуксё пичи дырлэн сокем чебер, шуныт, шудо нуналъёсыз. Тани вӧез келям. Каллен-каллен черсон, урдэг лёгон, ыжгонэн вырон ужъёсты йылпумъяло. Тулыс юж лымы вылтӥ кутско гужамон ужъёс: ог-огедлы вӧлдэт миськон, юрт котырдэ утялтон. Вуэ пучы жугон. Тыр толэзь ӟырдатэм таба выллем ӝутске, гурт пумын ини кырӟам-верам кылӥське:

- Верба вуиз, верба вуиз,

Арысь лыктэм ар нунал!

Быдӟымнал кылиз, Быдӟымнал кылиз возьманы!

Кыӵе шулдыр, шумпотоно!

Верба бертӥ куинь нуналскын кулэм потон уй нунал луэ. Вирнуналэ корка пушкы палэзьпу тыриськом, мунчое пыриськом, кулэмъёсты тодэ ваиськом. Нош арняӝытэ табань пыжиськом, со нунал, вазь ӵукна тыл поттыса, тыл вылтӥ тэтчаськом. Та нуналэ йырсиез сынаны уг яра, курег бакчаез, пе, ӵабъялоз, нуназе изьыны выдоно ӧвӧл, висисько шуоно ӧвӧл - быдэс аред озьы ортчоз. Со сяна, та нуналэ куазез но синйылтыны эн вунэтэ, уго гужемед но сыӵе ик луоз.

Тани кӧснунал вуиз. Со ӝыт мунчо эстэмын, пӧръёс пӧрамын, педлон шуныт, мылкыд лӧптэмын! Миськем корказетӥ шлёп-шлёп гольык пыдъёсын лёгаса вамышъямдэс тодӥськоды на, дыр? Ӵуказеяз ӵукна нош ик мунчое пыриськом, азвесь вуэн пыласькиськом (со понна азьвыл ӝытаз вуэ азвесь коньдон куштоно). Пыласькыку азвесь кадь чылкыт, таза мед луомы шуоно. Собере ини ведра карнандэ кутыса, песяен ӵош вамыштӥськом ошмес вулы. Песяй дышетэ:

- Ведраостэ гылты, шунды бергамъя погыльты, остэ инмаре шуыса бур палтӥ вудэ омырты. Со ини луэ тыр ву – ӝук пӧсьтыны.

Тау карисько песяелы, туннэ нуналозь но верам дышетэм кылъёсыз юртто, сюлме пыӵамон валэктэм сям-йылолъёслэсь радлыксэс азьланьтыны тыршисько. Нош туала пиналъёсмы шӧдо на меда Быдӟымналлэсь вуэмзэ, солэсь чебер но бадӟым кужымзэ валало меда? Табере ни асьмелы сюлмаськоно пиналъёсмылы сое валэктон, кельтон понна.

Татышлы ёросысь Арибаш гурт.