«Песяйёсын сюлмысь ужаськомы»

Гожан гуртысь клубен куать ар ни Лариса Зарипзянова кивалтэ. Солэн кичӧлтэмез улсын, татын арлыдо кышномуртъёслэн «Пинал сюлэм» ансамбльзы, бадӟым классъёсын дышетскисьёслэн «Девчата» эктон коллективзы но ужась егитъёслэн «Весёлый каламбур» драмкружоксы ужа.
Лариса Юрьевна культура удысэ вуэмезлэсь азьвыл гурт хозяйствоын осеменаторын тыршем. Нош сюлэмыз культура ӧре юн кыскем. Озьы со клубазы нырысь диджей луыса ужам, нош собере – худрукын. Лариса Юрьевна татын тыршыкуз ик Пермьысь культурая колледжын ужзэ вис карытэк тодон-валан люкам. «Песянайёсын сюлмысь ужаськомы, - вера со. – Удмурт калыкмылэсь сям-йылолъёссэ возьматӥськом, кырӟан-эктонъёсты быдэстӥськом. Пинал сюлэмъёстэк гуртысь одӥгез ужрад но уг ортчы». Со сяна, соос ёросысьтызы, шаеразы ортчись ужрадъёсы но мылысь-кыдысь пырисько. «Перме финн-угор калыкъёслэн нуналазы вуылӥмы. Отын асьмелэсь калык дӥськутъёсмес возьматӥмы, солэн историеныз тодматӥмы, - верало ансамбле ветлӥсь песяйёс. - Удмурт пӧръёсъя мастер-класс возьматӥмы. Отын перепеч пыжыны дышетӥм». Дӥськутъёссы пумысен верано ке, «Пинал сюлэм» ансамбле ветлӥсьёслы «Лукойл-Пермь» ООО кыкетӥ ползэ ни костюм вурыны коньдонэн юрттэт возьматэм.
Пинал сюлэмъёс – Лидия Шаяхметова, Галина Широбокова, Лидия Марданова, Зоя Валиятова, Анна Шакирокова, Анфиза Зедымышева, Чужин Моллахматова, Кашифа Менгараева, Лариса Зарипзянова, Валентина Метяшева, Фаина Ахмадышина – кырӟаны-эктыны усточи сяна, киужъёслы но шаплыесь. Песяйёс Вормон Нуналэ ожысь но солэн мышказ тыршем ветеранъёслы шуныт ныросъёс керттыса кузьмаллям.
Ансамбле ветлӥсьёс гуртсылэн улоназ но мыло-кыдо пырисько. «Нюлэскысь узьым вайыса гуртмы вӧзы посадка мерттӥмы, ураммес котьку утялтыса возиськом, юбоосты буяськом, ошмесъёсты тазатӥськом», - верало соос.
Лулчеберет удысын уж пӧзе. Но клубен кивалтӥсез юртсылэн «пересьмемез» сюлмаськытэ. Со, пе, 1965-тӥ арын ик вуж брусъёслэсь ӝутэмын. «Туэ клуб ӝутыны оскытӥзы вал, - вера Лариса Юрьевна. - Но гурт калык губернаторлэсь газ куриз. Газ гумыос кыскыны проект ужаське ни. Клубмы но одно ик луоз. Со кема уз ӝутӥськы». Оскон кылдэ, гожанъёслэн малпанзы быдэсмоз.

(Материал газетэ 2018-тӥ арысь 7-тӥ инвожое потэмын).