Дун чылкыт Валентинлэн яке Эшъёслэн нуналзы

-Кыӵе луыны кулэ зэмос эш?

-Солэн сюлмаз котьку тыныд интыез луоз, со тонэ котьку кылзоз, шуге-леке сюрыкуд, тонэ котьку утьыны но тыныд дурбасьтыны тыршо.
Сыӵе юан пукто но асьсэос валэктон утчало пичи нылпиос.
Финнъёс, эстонъёс понна эшъёслэн нуналзы – со эшъёс, яратӥсьёс, матысьёс, тодмотэм адямиос вискын кусыпъёс шоры мукет синмын учкон. Малы дун чылкыт Валентинлэн нуналыз Эшъёслэн нуналзылы пӧрмиз? Тужгес валтӥсь мугез таӵе, дыр - та нуналэ ог-огзэс яратӥсьёс гинэ уг шулдыръясько, котькин но быгатэ эшъёссэс ӟечкыланы но соослы саклык висъяны, пичи ке но, кузьым кузьманы. Та нуналэ ог-огзылы «валентинкаос»,горд сяськаос, шоколад, шудонъёс кузьмало.
Ӵемысь магазинъёсын дун кулэстонъёс, мукет акциос радъясько. Огпол Финляндилэн шоркарысьтыз кинотеатръёс Эшъёслэн нуналазы «кык адями одӥг билетэн» акция лэсьтӥзы.

Ку, туннэ ке ӧвӧл, матысь адямиостылы "мон тонэ яратӥсько", "ma armastan sind", "minä rakastan sinua" шуыса вералоды? Сыӵе кылъёс вераны дӥсьтӥды ке, дуннеын улон но, оло, лякытгес но каньылгес луоз?
Нош тӥ кызьы пумитаськоды та нуналэз?