+18 °С
Салкым
Антитеррор
Вань иворъёс
Лулчеберет
4 ноябрь 2019, 23:04

Ӟазег ишкон веме

Пичи дырме тодам ваисько ке, дорамы котьку одӥг айы но одӥг-кык мумы ӟазег тол потто вал. Со айы ӟазег малы ке пичи нылпиосты уе вал, соин азбаре яке гидэ пырон туж бадӟым ужпумлы пӧрме вал. Мумы ӟазегъёсты корка пыртыса пузато, нош пукыкузы ӟазегпиос потытозь воксё коркан возё вал. Сыӵе дыръёс кемалась вунэмын ни, нош ӟазег кызьы вордо вал, али но озьы ик вордо. Только табере ӟазегпиосты басьто инкубаторысь.

Зэмос тол ӧз на вуы, нош Татышлы ёросысь Уразгильды гуртысь кык ӟазег ишкон вемее ветлӥ ни. Мынытэк ӧйлась.
Кин ке ӟазегъёссы кӧй медаз луэ шуыса, кезьытэз возьматэк ик вандэ, кин ке нырысетӥ лымыез но куазьлэсь кынтэмзэ вите. Удмуртъёс "Ӟазег ишкон вемее"ӵыжы-выжы, бускель, та ужез провор ужась кышноосты ӧтё. Вазь ӵукна ик мунчо эсто, ужасьёслы шуныт мед луоз но кутӥськыны пӧсь ву мед луоз шуыса. Вандэм ӟазеглэсь йырзэ, кукъёссэ, бурдзэ вандыса, сое пуртые парить карыны поно (гонэз умой мед ишкиськоз шуыса, кӧня ке минут быректэм ву вылын возё). Вераськыса, ӟазегез парись кышноез курласа яке умой паремез понна мактаса, ӟазег ишкон шулдыр ортче. Кузё кышно гагагак! кесяськыса, ужасьёссэ сектаны пыре. Одӥг ӟазег ишкемын ни ке, солэсь пушсэ поттылыса но миськыса, корка пӧзьтыны пырто.
Азьло ӟазегъёсты, карнанлэн кык палаз ошыса, ошмесэ нуыса гылъяло вылэм. Али котькуд адямилэн вуэз дораз бере, озьы уг выро ни. Азьвыл ӟазег ишкисьёсты нимаз сӥлы каро вал, шыд сиыны ӧтьыса (веранэз гинэ шыд, ӝук сиён ке но со). Ӟазег ишкисьёслы азязы ӟазеглэсь йырзэ, куксэ, ӵемонзэ сёто вал. Али шыд сиыны ӧтчась туж ӧвӧл ни, соин шыд сиёнэз соку ик уж бырем бере ортчыто, ӟазег пӧзьтэм лымын ӝук пӧзьто. Ужасьёс йыр, ӵемон, кук сиё, кузёослы сӥльзэс ӟеч сиыны мед гожтоз шуыса сӥзё, кылем пудооссы таза мед луозы, вуоно арын нош трос мед луоз ӟазегды шуо.
Читайте нас: