Кулэ карозы-а вуоно нылпиос вашкалаез?

«Дунне вылын кузёяське кызь одӥгетӥ даурлэн кутсконэз. Нош кыӵе зол со висъяське кызетӥезлэсь! Улон азьланьтӥське туж ӝог. Туала нылпиос уг тодо ни колхозын ужанэз. Ма веранэз, соос ӧвӧл дышетэмын бакчаысь жаг-турынэз урыны, будосъёс вылэ ву киськаны, турын мажсаны. Со понна соос валало выль технологиосты улоназы кутыны: «оп!» шуытозь герӟалозы кунгож сьӧрысь бӧлякъёсыныды, утчалозы но шедьтозы витьтоно ар пумиськылымтэ ӵыжы-выжыостэс но радъялозы соосын кусыпъёс. Котькуд вакытлэн аслад тодметъёсыз, аслаз улон радлыкез. Туннэ нунал но пересьмоз, кылёз историе. Милемдыс воштозы пиналъёс. Уз-а меда поты тодэмзы соослэн милям улонмы сярысь? Ма сюлэмшугъяськытэ милемдыс туннэ, кыӵе малпанъёсын улӥськом, мае возьмаськом ӵуказе нуналлэсь? Таӵе ик юанъёсы мынам аслам пересь песяйёсылы. Но верась ӧвӧл ни», - таӵе сюлэм пушкысь потэм чуръёсты шедьтӥ Удмуртиысь Эгра ёросысь Кабачигуртэ вуыса. Гожтэм сооосты анаез палтӥ Кайсы выжыосызлы сӥзем альбомаз Вера Никифоровна Чиркова.

Куное гинэ мыныса, малпамтэ шорысь тупай та Кайсы выжыослэн пумиськоназы. Пӧртэм-пӧртэм интыосын улӥсь сизьымдонлэсь ятыр Кайсыос люкаськизы Лонки-Ворцы гуртэ. Асьме дорын выжылы сӥзем таӵе пумиськонъёс мукет форматэн радъясько. Кызьы со ортчиз Мазьгиын (авт. - гуртлэн удмурт нимыз)? Вань куноос нырысь пумиськизы Вортча воршудлэн ошмес дораз. Кызьы валады ини, Лонки-Ворцы гуртэз кылдытӥсь воршуд – Вортча. Солэн пусэз юнматэмын ошмес доры но. Кайсы выжы писпулэн пӧртэм вайёсы пырись адямиос киосазы турлы тусо лентаос бинизы. Озьы валаны луиз, кыӵе вайысь таиз яке соиз адями. Выжыен тодматон бере Кайсыослэсь выжы пулзэс гуртысь кык юрт борды юнматӥзы. Жаляса верано, Башкортостанысь удмуртъёс воршуд нимзэс вунэтӥзы ни, выжы пусъёс сярысь веранэз ик ӧвӧл.

Лонки-Ворцы гуртын вань «Ошмес» ансамбльзы. Ужрадэз соос кырӟанъёсын шулдыртӥзы. Ачим но «Ошмес» газетын ужасько бере, ошмесчиослы вазиськыкузы, мыным вазё кожаса, амалтэк йырме берыктылӥ. Удмурт но ӟуч кырӟанъёсын гуртэз котыртыса, ужрад азьланьтӥськиз культура юртын ӝӧк сьӧрын: матысьгес тодматсконэн, туспуктэмъёсты учконэн, кырӟанъёсын, конкурсъёсын.

400 адямилэсь сылӥсь выжы писпу бордаз трос адямиез кыскиз. Ваньзылэн тодэмзы потэ уго кызьы ӵыжы-выжыос луэмзэс. Та писпуэз лэсьтонэ Вера Никифоровналэн но трос кужымез, дырыз но мылкыдыз понэмын. Нош мылкыд солэн – трос на, арлыдызлы учкытэк, пачыласа улэ.

Пенсиын ке но, Вера Никифоровна ужа. Со кема аръёс ӵоже Кабачигуртысь библиотекаен кивалтӥз, али но яратоно ужаз ик библиотекарь луыса тырше. Покчиосты но бадӟымъёсты книга дуннеен тодматон сяна, со ужрадъёс ортчытъя, шаертодонъя утчаськон уж нуэ, кык музейлэсь котырзэ уте но калыклы возьматэ. Историяя но шаертодонъя музей сяна, библиотека бордын вань П.К. Поздеевлы сӥзем музей но. Малы ке шуоно гожъяськись, литературовед, фольклорист П. Поздеев та ёросын вордӥськемын но Кабачигурт библиотекалы сётэмын солэн нимыз.

Кыӵе мылкыдын берытски дор палам? Эгра ёросын но, асьмелэн, Башкортостанын но, каллен-каллен вунэ вашкалаез. Ӵыжы-выжыез возьматӥсь «ӵужморт», «кенак» нимъёс кутӥсько вылэм соос дорын но, нош али соос ӧвӧл ни. Зэм вера Вера Никифоровна, вуоно поколенимылэн тодэмез потоз выжыоссы сярысь. Соин ик, ма вань на, сое утёно, гожъяно, кельтоно.