Клублэн ӧсъёсыз котьку усьтэмын

Качкин-Турай – Калтасы ёросысь одӥгез удмурт гурт. Туэ со 300 ар тырмонзэ пусйиз. Татын тыршись, ужез гажась калык улэ. Тросэз «Победа» ООО-ын ужало. Уйпала ветлыса ужасьёс но вань. Гуртлэн урамъёстӥз ортчыса валаны луэ: татын егитъёс но трос. Огзылэсь огзы пӧртэмесь, выль коркаос чеберлыкенызы бордазы кыско. Гуртэз урамын шудӥсь пичи нылпиослэн куараоссы но шулдырто.

Азьло Качкин-Турайын покчи классъем школа но вань вылэм. Али, жаляса верано, тодон-валан юртлэн ӧсъёсыз ӵогаськемын. Татысь пиналъёс бускель гуртысь, Бадӟым Качакысь, школаын дышетско. Соосты отчы котькуд нунал школалэн автобусэныз нулло-ваё. Качкинъёс шумпото, гуртазы выль ФАП-сы, клубзы вань шуыса.

Татысь клубын Алина Зидыганова ужа. Культорганизаторлы вань ужъёсты аслыз быдэстоно луэ. Ужрадъёс дасян но, тазатон-утялтон но со вылын. «Клублэсь липетсэ кык ар талэсь азьло воштӥзы. Гужемлы быдэ пичияк тупатъян ужъёс быдэстыны тыршиськом. Пушсэ утялтыны буёл сёто», - вера Алина Сабирьяновна.

Клубъёс – пичи гуртъёслэн сюлэмзы, шуыны луоз. Татын арлэн котькыӵе вакытаз уж пӧзе. Каникулын но Алина Сабирьяновна нылпиослы ужрадъёс ортчытон сярысь сюлмаське. Бадӟымъёсын ужаны но дыр шедьтэ. «Ӟардон» удмурт фольклор ансамбль, кылсярысь, гуртазы ортчись котькуд ужрадэ пыриське. «Ансамбле гуртысь нылкышноос ветло: Юлия Ахметшина, Алина Нигаматзянова, Филия Зайруллина, Надежда Арсланова, Екатерина Насипуллина, Фирая Гизитдинова, Альфия Нургалиева, Адуся Бадамшина, Ксения Фархутдинова, Кифая Абдуллина, Ольга Шакирова но Гузалия Шакирова. Мон соослы пумтэм тау кылъёсме верасько. Кылсярысь, туэ гуртлэн юбилеяз трос дасяськоно вал. Ваньзы юрттӥськизы. Арганчимылы Рафис Зидыгановлы но бадӟым тау. Огкылын вераса, гуртоослы ваньзылы бадӟым тау», - шуэ клубын ужась.

Клубын нылпиослы но ансамбльёс кылдытэмын. «Солнышко», «Рябинушка» коллективъёсы пыриськись пиналъёсты Алина Сабирьяновна эктыны, кырӟаны дышетэ. Соос ик трос дыръя ӧнерчилэн юрттӥсьёсыз но луо – ужрадъёсты ӵошен дасяло-ортчыто. Алина Сабирьяновналэн верамезъя, ужез солы кельше. «Мӧзмыт ӧвӧл, уждуре лыктыса шуг-секытъёс но вуно», - шуэ со. Но луо сыӵе сюлмаськонъёс, кудъёсыз уже лыктыса сюлэмез юнгес позырто. Кылсярысь, Качкин-Турай клублэн аппаратураез вужмемын, микрофонъёс ӧвӧл, пе. Но ужзэ гажась культорганизатор умоезлы оскыны дышемын. Азьпалан выль аппаратураен со эшшо тунсыкогес ужрадъёс ортчытыны малпа.

Миляуша БУЛАТОВА.

Калтасы ёрос.