-23 °С
Яркыт
Антитеррор
Вань иворъёс
Лулчеберет
26 Июля 2018, 12:24

Санкт-Петербургын Гербер ортчоз

28-тӥ пӧсьтолэзе Санкт-Петербургын, «Озеро Долгое» паркын, «Гербер» удмурт калык праздник ортчоз.

28-тӥ пӧсьтолэзе Санкт-Петербургын, «Озеро Долгое» паркын, «Гербер» удмурт калык праздник ортчоз. Та ужрад отын нырысьсэ радъяське. УР-ысь Культурая но туризмъя министерстволэн сайтысьтыз иворъя, Герберын пӧртэм тематической площадкаос ужалозы. Пӧраськон-пыжиськон площадкаын удмурт калык пӧръёсын тодматскыны луоз, отын куноосты табанен, перепечен пумиталозы. Мылкыд карисьёс вӧсяськем ӝук пӧзьтонэ пыриськыны, вӧсям ӝукез веръяны быгатозы. Крезьгур площадкаын Удмурт Элькунысь, Санкт-Петербургысь но Москваысь фольклор коллективъёс кырӟан-эктонъёссэс кузьмалозы. Озьы ик Гербере лыктэмъёсты Башкортостанысь удмурт фольклор ансамбльёс но шулдыртозы.
Праздникын ярмарка но ужалоз. Удмурт Республикаысь но Ленинград улосвылысь ремеслоосъя юртъёсысь кибашлыос декоративно-прикладной творчествоя ужъёссэс возьматозы.
Герберез радъяло: Санкт-Петербургысь миграционной политикаез азинтонъя но калык кусыпъёсты юнматонъя комитет, УР-ысь Национальной политикая министерство, Санкт-Петербургысь Национальностьёсъя юрт, УР-ысь Калыкъёслэн эшъяськон юртсы, «Всеудмуртская ассоциация «Удмурт Кенеш» огазеяськонлэн Санкт-Петербургысь но Ленинград улосвылысь ёзэтэз, Санкт-Петербургысь удмурт землячество но «Италмас» СЗФО.
Читайте нас в