«Льӧмпуос сяськаяку»

Башкортостанысь удмуртъёслэн историяя но культурая центрзы Татышлы ёросысь удмурт нылкышноослэн клубенызы ӵош туж шулдыр пичи удмурт гуртын – Майскын – «Льӧмпуос сяськаяку» ужрад ортчытӥз. Та нуналэ арлыдоослы юртлэн азбараз (али со ворсаськемын ни) трос калык люкаськиз. Удмурт калык дӥськутъёсын нылкышноос шулдыресь кырӟанъёс быдэстӥзы, кылбур чуръёс лыдӟизы. Шулдыресь крезьгуръёссэ кисьтӥз Майскысь тужгес арлыдо улӥсь Файзылхан Нуриев. Егит дырез тодэ вайытӥсь ужрадэ «Ошмес» газетлэн водителез Владимир Нуриев но вуылӥз. Атаеныз, Файзылхан агаен ӵош, со арганзэ кыскыса ортчиз бызьылыса будэм ульчаетӥз. «Историяя но культурая центрлэн нимыныз бадӟым тау кылъёс верасько ваньзылы, кин праздникмес ортчытын юрттӥз но кин милемын ӵошен луиз. Мед улозы пичи гуртъёсмы, мед улоз мусо но кужмо удмурт калыкмы», - вера ИКЦ-лэн валтӥсь ӧнерчиез Ирина Самигулова.