Вылтуссы но чебер, лулпушсы но узыр

Ӝыт дэремез возьматон

Нырысетӥ конкурсын сцена вылэ ӝыт дэремен дас чебер нылъёс потӥзы. Калтасы ёросысь Кургакысь Дарья Гадыршина, Янаул ёросысь Кониговоысь Яна Зайдуллина, Выль Варяшысь Диана Насибуллина, Барабановкаысь Есения Куснимарданова, Вылысь Барабановкаысь Светлана Набиуллина, Татышлы ёросысь Кызыл-Ярысь Виктория Зарипова, Выль Татышлыысь Линда Гильманова, Калмиярысь Ника Муллаярова, Куеда ёросысь Анастасия Кабибзянова но Валерия Темирова тулыс ӝужась ненег сяськаос выллем адскизы. Нош ӝыт дэремъёссы соослэсь веськрес мугоръёссэс яркытгес возьматӥзы. Ужрадэз усьтыны кыл сётӥськиз Янаул ёрос администрациен кивалтӥсьлэн социальной ужпумъёсъя воштӥсезлы Г. Я. Миндияровалы но БР-ысь удмуртъёслэн историяя но культурая центренызы кивалтӥсьлы И. М. Самигуловалы. Та нуналэ Гаухар Ясавиевна Вуж Варяш гурт поселениен кивалтӥсез М. Ш. Шаритдиновез, интыысь удмурт огазеяськонэн кивалтӥсез Ю. С. Саитовез но республикаысь удмуртъёслэн национально-культурной центренызы кивалтӥсез С. Г. Гарифуллинэз данъян грамотаосын пусйиз.

Астэ возьматон

Тросэз учкисьёс асьсэлэсь чеберайёссэс нырысетӥ конкурс бере ик бырйизы, дыр. Нош нылъёслы паськытгес усьтӥськыны юрттӥз «Мон но мынам вордӥськем шаере» конкурс. Чеберайёс куинь минут куспын вакчияк асьсэ сярысьтызы веразы: семьязы, дышетскем юртсы, эшъёссы, дорзы сярысь. Со понна нылъёс котькудзы аспӧртэм амал шедьтыны тыршиллям. Соин, лэся, жюрилы кык конкурс бере устооссэ быръён секытэнгес сётӥськиз. Азьпалтыса верало, та нуналэ жюриен кивалтӥз Удмурт Элькунысь «Шулдыр ӝыт» театрлэн администраторез Михаил Михайлов. Солы юрттӥзы Удмурт Элькунысь Эшъяськон юртын, «Удмурт дунне» газетын ужасьёс Ксения Широбокова, Любовь Михайлова, Лена Рябина, Пермь шаерысь удмуртъёслэн огазеяськонэнызы кивалтӥсь С. И. Гадиятов. Кык конкурс бере тросгес балл люкаса, азьпала потӥзы Линда Гильманова, Диана Насибуллина но Валерия Темирова. Озьы ке но вормонэз люкыны вазьгес на вал, азьпалан нылъёсты трос пӧртэм тунсыко конкурсъёс витё на.

(Быдэсак материалэз газетысь лыдӟыны быгатоды).