"Мынам уже - со мынам улонэ"

Кин луоно? Улоназ котькуд адями та юанлы валэктон утча, дыр. Калтасы ёросысь Вылысь Тыхтем гуртын улӥсь Виктория Камидуллина пичи дыръяз ик тодэм, со лулчеберет удысын ужалоз шуыса. Виктория 2013-тӥ арысен гуртысьтызы культура юртын культорганизаторын тырше. Ас ужзэ со туж яратэ. «Мынам уже – со мынам улонэ», - шуэ Виктория Валентиновна. Ужез сярысь со дугдытэк мадьыны быгатэ, соку солэн синъёсаз яркытэсь тылгизьыос ӝуатско, кожалод.

- Мынам пичи дыры культура юртын ортчиз, шуыны луоз, малы ке шуоно анае худрук луыса ужа вал. Али со культура юртэнымы кивалтэ. Анай монэ котьку сьӧраз басьтылӥз. Соку мон малпай, быдэ вуыса культура юртын ужало шуыса. Анай шоры учкыса, котьку паймисько вал, кызьы со ваньмаз вутске? Сценариос но гожтэ, ужкагазъёс бордын но кема пуке, концерт номеръёс но малпа. Азьло, туннэ нуналэн ӵошатоно ке, егитъёс культура юртын шутэтско вал, вокалъя но эктонъя кружокъёсы ветлӥсьёс но трос луылӥзы, - вера Виктория. – Мон вить аресысен эктонъя кружоке ветлыны кутски. «Ӝужась кизилиос» коллективен удмурт эктонъёсты ӵем дышетӥськом вал.

Кӧня ке арскын Виктория «Ингур» удмурт калык ансамбле ветлыны кутскем. Бадӟым классъёсын со Калтасыысь кыкетӥ номеро школаын дышетскем. Озьы ке но ӝыт репетициосы потаны дыр шедьтэ вылэм. Тани вить ар ӵоже ини Виктория йырыныз-пыдыныз лулчеберет ӧре «выемын». Табере со ачиз «Ӝужась кизилиос» коллективен кивалтэ.

- Ужме мон репертуарез выльдон бордысен азинтӥ, коллективен задор эктонъёс дышетон борды басьтӥським. Пичиосын ужанэз капчи, соосын ӵошен ми выль номеръёс, эктонъёс дасяськом, - шуэ В. Камидуллина.

Егит ӧнерчилэн кужымез, дырез котьмалы тырме. Котькыӵе праздник мед луоз, культура юртын одно ик тунсыко ужрад ортче. Гуртоос сяна, отчы бускель гуртъёсысь но учкисьёс вуо. Кылем гужем, кылсярысь, ингуръёс Татарстанын радъяськем «Чакара» регионъёс куспысь фестивале но вуылӥзы. Кема ӧвӧл Вылысь Тыхтем культура юртын выль «Ритм» эктон группа кылдӥз. Отчы пыриськисьёсты Виктория Валентиновна туала эктонъёслы дышетэ, хореографияя постановкаос но композициос лэсьтон бордын но соос ужало.

Виктория вуриськыны яратэ. Та быгатонлыксэ со ужаз но кутэ. Нырысь эскизъёс бордын пуке, собере соосты учкыса нылпиослы эктыны костюмъёс вуре.

- Пичи дыръя мон мунёосылы дэремъёс вурисько вал. Табере мынам мунёосы – со коллективе ветлӥсь, культура юртлэн улоназ азинлыко пыриськись пичи нылъёс. Ужме мон яратӥсько, ӵукналы быдэ культура юртэ шумпотыса вамыштӥсько, отысь «бурдъяськыса» бертӥсько – выль малпанъёсын. Бадӟым тау анаелы, со монэ котьмалы дышетэ, кенеш но сётэ, со котьку монэн артэ, - шуэ Виктория.

Зэм, Илюза Тимиртдиновна лулчеберет удысын кема аръёс ӵоже тырше ни. Ас ужзэ яратон мылкыдзэ со нылызлы но пыӵатыны быгатэм. Виктория Валентиновналэн азяз - паськыт сюрес. Оскисько, солэн вань малпанъёсыз быдэсмозы, вормонъёсы нуись тубат кузя со вылӥе но вылӥе ӝутскоз. Со туала улонэн артэ вамышъя угось. Калтасы ёросын культура удысын мар вылез меда шуид ке, нырысь ик Вылысь Тыхтемын ортчем ужрад сярысь тодод. Виктория гуртазы луэм ужрадъёс сярысь иворъёссэ ӝегатскытэк соцсетьёсы интыя. Калык но, пе, мед адӟоз гуртмылэсь улэм-вылэмзэ, шутэтскемзэ-шулдыръяськемзэ.

Миляуша БУЛАТОВА.

Калтасы ёрос.