Одӥг семьяын кадь улӥськом

Паймисько, шумпотӥсько но данъяськисько Ваня (Банибаш) гуртын улӥсь калыкеным. Милям гуртмы пичи гинэ, оло, соин одӥг семьяын кадь улӥськом. Вань ужъёсты огъя быдэсъяськом. Кыӵе задор мылкыдо калык улэ гуртам!

Дас тямысэтӥ тулыспалэ, кылсярысь, быдэс гуртэн Вӧез келямы. Конкурсъёсы пичиен-бадӟымен пыриськизы, шудӥмы, серекъямы, сульдэр но ӝуатӥмы. Собере ваньмы ӵош самоварын быректэм чай юимы. Нош кызетӥ тулыспалэ Ямадыын удмурт кылъя но литературая дышетӥсьёслэн Анай кыллэн нуналэзлы сӥзем семинарзы ортчиз. Шумпотымон, отчы Истяк шор ёзо школаысь удмурт кылъя дышетӥсь Алёна Александровна Гизитдинова покчи классъёсын дышетскисьёсты нуиз. Денис Султанов но Ефим Закиров Ямадыысь кыкетӥ интыен берытскизы. Соос В. Широбоковлэн «Визнасьёс» веросэзъя сценка возьматӥллям. Со сяна, Ефим «Приз зрительских симпатий» номинацилы кузё луэм. Ми солы быдэс гуртэн шумпотӥм.

Шаермес утисьёслэн нуналазы бускель Истяк гуртын «Папа, мама, я – спортивная семья» ужрад ортчиз. Отчы ньыль гуртъёсысь егит семьяос пыриськизы. Милям гуртмы понна Алина, Андрей но Ярослав Мухтаровъёс шудӥзы, командазы «Ваняшки» нимаськиз. Кылем арын но соос ик гуртмылэсь данзэ быгатыса утизы. Туэ но ужрадэ кузпалъёс ӟеч дасяськемын вал. Калыкез перепечен куноязы. «Армие келян» йылолэз но усто возьматӥзы. Ӵошатсконын соосты тужгес творческой семья шуыса пусйизы. Мухтаровъёслы «Инвожо» коллективе ветлӥсь нылкышноос мылысь-кыдысь юрттӥськизы. Ужрад туж шулдыр ортчиз. Куазь кезьыт ке но вал, гуртооссы понна «висьыны» трос калык люкаськиз.

Ульяна ЯППАРОВА.

Туспуктэмез Ангелина Аминовалэн.

Янаул ёросысь Банибаш гурт.