Крезьгур котьку улоз, уз ышы

Бурай ёросын кык арлы огпол «Уз ышы крезьгур» вокал жанръя ёрос фестиваль-конкурс ялӥське. Туэ кырӟанлы сӥзем бадӟым праздник Кушманак гуртысь культура юртын ортчиз. Ужрадэ Бурай ёрос администрациен кивалтӥсьлэн воштӥсез Н. М. Хаматдинов но культура ёзэтэн кивалтӥсь И. З. Харисов пыриськизы. Конкурсэ вуэмъёслы соос вормонъёс сӥзизы.

Та фестиваль-конкурс, вераны кулэ, арысь аре тросгес но тросгес кырӟаны яратӥсьёсты люка. Туэ фестивале 96 конкурсантъёс пыриськизы, соос пӧлысь 31-ез – вокалъя коллективъёс, 11-ез – дуэтъёс, 54-ез – оген кырӟасьёс.

Алтау гуртысь «Инвожо» калык ансамбль, Байшадыысь «Туганэ» коллектив но Мамадыысь «Купанча» ансамбль фестиваль-конкурслы аспӧртэм шӧм пыртӥзы. Удмурт ансамбльёс авторской но калык кырӟанъёсты быдэстӥзы. Учкисьёс соосты туж шуныт пумитазы, кужмо кичабонъёсын келязы. Алтауысь Белла Гафутдинова но конкурсын кырӟаны устолыксэ возьматӥз.

- Геннадий Ганьковлэсь «Ой, зоре» кырӟанзэ быдэстӥ. Фестивальын «Надежда» номинациен пусйизы, - вера Б. Гафутдинова.

Фестиваль-конкурс кык арскын нош радъяськоз. Со дырозь ужрадэ пыриськемъёслэн, туэ вормисе потымтэослэн выль малпанъёссы кылдозы. Соос «крезьгур тубатэтӥ» вылӥегес ӝутскыны быгатозы.

Миляуша

НИГАМАТУЛЛИНА.

Бурай ёрос.