-10 °С
Салкым
Антитеррор
Вань иворъёс
Лулчеберет
28 Куарусён 2017, 14:19

Удмуртъёс но мордваос - эшлыко финн-угор калыкъёс

Кылем арняын Фёдоровка ёросын БР-ысь мордваослэн национально-культурной центрзылы 20 ар тырмонлы сӥзем ужрад ортчиз.

Кылем арняын Фёдоровка ёросын БР-ысь мордваослэн национально-культурной центрзылы 20 ар тырмонлы сӥзем ужрад ортчиз.
«Фёдоровкаын милемыз, куноосты, туж шуныт пумитазы, - вера БР-ысь удмуртъёслэн национально-культурной центренызы кивалтӥсь Салимьян Гарифуллин. – Кузёос нырысь Кузьминовка гуртысь Совето Союзысь Геройлэсь Н. Т. Антошкинлэсь нимзэ нуллӥсь школаен тодматӥзы».
Собере республикаысь ньыль городъёсысь но 12 ёросъёсысь делегатъёсты отчётно-выборной конференцие ӧтизы. Отын огазеяськонлэн берло вить ар куспын быдэстэм ужъёсызлы йылпумъянъёс лэсьтӥзы. Со сяна, та нуналэ мордваос огазеяськонзылы кивалтӥсь бырйизы. Та ужез соос выльысь БР-ысь Кун Собранилэн-Курултайлэн депутатэзлы, азьвыл кивалтӥсьсылы Юлия Николаевна Герасимовалы оскизы. Конференциын пӧртэм ёросъёсысь вуэм делегатъёс мордва калыклэн аслэсьтыз культуразэ, кылзэ утемез сярысь веразы.
 Огазеяськонлэн юбилеезлы сӥзем ужрад Фёдоровкаысь культура юртын азинскиз. Делегатъёс но куноос нырысь киужъёслэсь дасям адӟытонэн тодматскизы. Собере национально-культурной центрлэн ужаз мыло-кыдо пыриськисьёсты данъязы, учкисьёслы шулдыр кырӟан-эктонъёс кузьмазы. Вераны кулэ, мордваослы сӥзем ужрадын удмурт кырӟан гуръёс но чузъяськизы. Соосты быдэстӥз Улысь Балтачысь Алик Кайранов. Мордваос кема тодазы возёзы удмурт эшъёссэс. Салимьян Гарифуллинович со понна мордва огазеяськонэн кивалтӥсьлы синпель кузьым – удмурт ныл - кузьмаз.
Ольга
НИГАМАТУЛЛИНА.
Читайте нас в