«Азвесь ошмес» тупатэмын

Янаул ёросысь Наняды гуртын улӥсьёс «Азвесь ошмесэ» нуись сюресэз ноку вунэтӥллямтэ, котьку гуртысьтызы ошмесэнызы данъяськыса улӥллям. Али но данъясько. Дун ву кузьмась ошмессэс утялтыса, тазатыса уло. Котырысьтыз одӥг жуг-жагез но уд шедьты. Кыдёкысен ик син шоры йӧто кашпоосын будӥсь сяськаос. Кематэк ӝутскозы радэн-радэн мерттэм пичиесь лыз кызъёс.

- «Азвесь ошмесэз» кылем арын тупатӥмы, асьме кужымен, нокыӵе программаен пайдаяськытэк. Вераны кулэ, Нанядыын аспӧртэм калык улэ, соос котьма уж борды капчиен, ӵошен басьтӥсько. Тупатэм ошмесэз но соос асьсэос утялтыса возё, - вера Вуж Варяш гурт поселенилэн администрациеныз кивалтӥсь Миншакир Шаритдинов. - «Русское географическое обществолэн» Янаул ёросысь ёзэтэз туэ «Живи, родник!» ёрос конкурс радъяз, ёросысь тупатэм ошмесъёсты эскериз. Нанядыысь «Азвесь ошмеслы» кыкетӥ инты сётэмын.

Ошмесэз тупатон – со памятник пуктэм выллем. Лэсьтэм ошмес дуре нуись сюресэз жаг турын ноку уз зӥбы. Жильыраса бызись вулэн гурез гуртэз шулдыртоз, отын улӥсь калыклы выль кужым сётоз.

Миляуша

НИГАМАТУЛЛИНА.

Янаул ёрос.