-6 °С
Лымы
Антитеррор
Вань иворъёс
Лулчеберет
1 южтолэзь 2017, 17:11

Кырӟам, эктӥм, шудӥм, «Ӵӧжы табань» но пыжим

Пӧсьтолэзе милемлы - Калтасы ёросысь Бадӟым Качакысь «Зангари» ансамбльлы - Удмурт Элькунын ортчем финн-угор пӧръёслы сӥзем «Быг-быг» калыккуспо фестивале вуылыны шуд усиз. Фестиваль «Быги – культурная столица финно-угорского мира-2014» калыккуспо программа улсын радъяськиз. Сое радъяло но учредительёсыз луо Шаркан ёрос администрация, «Быгинское» муниципал огазеяськон. Озьы ик фестивалез радъяны юрттэт возьмато УР-ысь Культурая но туризмъя министерство, Йӧскалык политикая министерство.

Ужрадэ Эстониын, Финляндиын но РФ-лэн субъектъёсаз улӥсь финн-угор калыкъёс пыриськизы. Пӧраськыны яратӥсьёс но кулинаръёс-профессионалъёс асьсэлэсь быгатонлыкъёссэс усто возьматӥзы. Соос пӧлын ик луизы общественной ужасьёс, журналистъёс, туристъёс но блогеръёс.

Ми – зангариос – фестивальын кык нунал луим. Нырысетӥ нуналаз куратормы экскурсия радъяз: Тол бабайлэн усадьбаяз вуылӥм. Бӧрысь Быги гуртэ мынӥм. Отын «Кулинарной поединок» радъяськиз. Ми но отчы пыриським. Конкурсэз концерт азьланьтӥз. Отын но быгатонлыкъёсмес возьматӥм. Нунал инбам улын радъяськем этнодискотекаен йылпумъяськиз.

Кыкетӥ нуналаз кулинарной мастерствомес адӟытӥм, театрализованной концертын «Ӵӧжы табань» йылолэз возьматӥм. Фестивальысь дипломъёсын но синпель кузьымъёсын берытским.