«Калыкты тӥляд ӟеч мылкыдо. Куно пумитаны быгатӥсь»

Башкортостанысь Калыкъёслэн эшъяськон юртсы республикаямы «Возрождение народных промыслов и традиций народов Башкортостана» проект радъя. Кылем арняын со удмуртъёслэн историяя но культурая центразы радъяськиз. Со улсын Татышлы ёросэ Уфаысь социальной технологияя институтысь студентъёс вуылӥзы. Соос пӧлысь тросэз «Правовая деятельность» факультетын 1-2-тӥ курсъёсын дышетско.

Студентъёсты Выль Татышлы культура юртын шулдыр удмурт кырӟанъёсын пумитазы. Егитъёс пӧлысь тросэзлэн соосты татчыозь кылэмзы ӧй вал на. Соин кырӟанлэсь котькуд кылзэ валаны тыршыса кылзӥзы. Нош собере куноосты ӝӧк сьӧры вазизы. Татын но соос чылкак паймемын вал. Кузёос егитъёслы чик тодмотэм сиён-юонъёс – пепереч, кальга ныро, шу кисаль - ӵектӥзы. Озьы студентъёс удмурт ӝӧк вылэн тодматскизы. «Вераськемзы но, сиён-юонъёссы но тунсыко», - ог-огенызы малпанъёсынызы люкисько егитъёс. Нош азьланяз соосты удмурт калык шудонъёс витё на вылэм. Выль Татышлыысь культура юртэн кивалтӥсь З. И. Фархутдинова студентъёсты кутэн но парен шудонъёсы ӧтиз. Та вакытэ Александр Галиев, Юрий но Сергей Нуриахметовъёс кубызэн но крезен шудыса, соосты удмурт гуръёсын шулдыртӥзы.

Республикаысьтымы удмуртъёсын тодматскон историяя но культурая центрын азинтӥськиз. Соин кивалтӥсь И. М. Самигулова студентъёсты егитъёслы сӥзем «Быдэ вуон» но «Усточикар» проектъёсын тодматӥз. «Быдэ вуэм нылъёс, тӥляд малпамдыя, мар быгатыны кулэ?» - юанэн вазиськиз историяя но культурая центрен кивалтӥсь студентъёслы. «Пӧраны», - огкылысь вазизы егитъёс. Соин кузёос, кунооссэс шаертодонъя музеен тодматэмзы бере, нылъёсты перепеч пыжыны дышетыны малпазы. Зэм, пӧраськон борды пиос но мылысь-кыдысь басьтӥськизы. Зульфира Хатиповалэн но Елена Нуриахметовалэн дышетэмзыя соос картофкалэсь, губилэсь, кузятэмлэсь перепеч пӧразы. Пыжиськемзы чебересь но ческытэсь пӧрмизы. Пыжиськонъя мастер-класс бере студентъёсты удмурт мунё лэсьтыны дышетӥзы на. Со борды Лилия Гараева басьтӥськиз. Та нуналэ со егитъёсты аслаз пичи дыраз вуттӥз. Со вакытэ пиналъёс магазинысь мунёосын шудӥллямтэ угось, соосты асьсэос лэсьтӥллям. Шудонъёссэс дасян понна кызъёслэсь йылъёссэс вандылыса, со вылэ басма биньылӥллям. Нош йыр интые горд сюйлэсь комок тыриллям. Со сяна, чагез но «дӥсятыса» шудыны йӧндыриллям на.

Выль Татышлыын пумиськонэз йылпумъяса, егит нылъёсты удмурт калык дӥськутъёсын дӥсятӥзы, эктыны дышетӥзы. Нош соослэн литератураен тодматсконзы Улысь Балтач школаын ортчиз. Отын кылбурлы сӥзем ӝыт радъяськиз. Нош ӵуказеяз егитъёсты Кызыл-Ярысь школаын витизы. Татын но соослы тунсыко ужрад дасяллям: студентъёс «Марӟан» калык ансамблен пумиськылӥзы. Песяйёс соослы калык кырӟанъёсты кырӟазы, шудонъёсты возьматӥзы. Со сяна, та нуналэ пумиськонэ БР-ысь удмуртъёслэн национально-культурной центренызы кивалтӥсь С. Г. Гарифуллин вуылӥз. Салимьян Гарифуллинович куноослы быдэс республикаысьтымы удмуртъёслэн улонзы сярысь мадиз.