Эшъёс пӧлын шулдыръяськон

КУИНЕТӤ толсуре Татышлы ёросысь Вязовкаысь «Уӵы ныл» ансамбльысь кырӟасьёс вазь ӵукна ик кузь сюрес вылэ потӥзы. Та нуналэ соосты Свердловск уловылысь эшъёссы «В кругу друзей» удмурт культурая фестивале куное витизы.

«В кругу друзей» фестиваль Дегтярскын туэ нырысьсэ ортчиз. Сое радъян сярысь городысь «Италмас» ансамбль но соин кивалтӥсь Фируза Галиева сюлмаськизы. Нош коньдонэн Дегтярск городлэн администрациез но культурая дворец юрттӥзы. Озьы италмасъёс доразы трос куноосты пумитаны быгатӥзы. Фестивале Удмурт Элькунысь Пичи Пурга ёросысь, Башкортостанысь но Свердловск улосвылысь ансамбльёс вуизы. «Куноосты нырысь музеен тодматӥмы. Отын декоративно-прикладной искусствоя адӟытон дасямын вал. Со сяна, татысь библиотекаын ужась Ирина Зайнуллина утись мунё лэсьтонъя мастер-класс возьматӥз на», - вера Янаул ёросысь Вуж Варяшын будэм Фируза Галиева.

Пумиськон ӝыт бадӟым концертэн йылпумъяськиз. Отын трос пӧртэм кырӟан гуръёс чузъяськизы, эктонъёс но фольклор композициос возьматӥськизы. Камьсӧр удмуртъёслэн кырӟанъёссы концертлы аспӧртэм шӧм пыӵатӥзы. Шуныт пумиськон задор мылкыд но выль эшъёс кузьмаз.