Пӧртэм кылын вераськиськом, эшъяськыса улӥськом

Башкортостан Республикаын пӧртэм финн-угор калыкъёс уло. Та нуналъёсы Краснокама, Мишкино но Янаул ёросъёсын соослэн культуразыя фестиваль ортчиз. Янаулын «Карусель дружбы» гала-концерт радъяськиз.

Башкортостанысь культурая министерствоен, Калык творчествоя республика центрен радъям фестивале республикаысь сизьым ёросъёсысь но куинь городъёсысь финн-угор коллективъёс вуизы. Со сяна, гала-концертэ пыриськизы на Ленинград улосвылысь «Армас» вепс калык фольклор ансамбль но декоративно-прикладной творчествоя «Кядеказ» калык студия. Соосты но учкисьёсты ӟечкыласа вераськизы республикаысь калык творчествоя республика юртлэн генеральной директорез Байрас Ишбердин но Янаул ёрос администрациен кивалтӥсь Ильшат Вазигатов. Соос шаерысьтымы пӧртэм калыкъёслэсь эшъяськыса улэмзэс пусйизы. Сое сцена вылын яркыт возьматӥз Янаулысь эктонъя «Мирас» калык ансамбль но. Соослэн эктоназы республикаысьтымы пӧртэм калыкъёслэн бадӟым тугокозы кылдӥз. Нош собере учкисьёслы чебер кырӟан-эктонъёссэс кузьмазы удмурт, пор, вепс ансамбльёс. Удмурт кырӟанъёсты быдэстӥзы Бурай ёросысь «Инвожо», Калтасы ёросысь «Ингур», Татышлы ёросысь «Ӧрӟи», Янаул ёросысь «Зангари», «Чибориё», «Югдон» ансамбльёс, Роман но Леонид Хазиповъёс

Финн-угор культурая фестиваль возьматӥз: республикаысьтымы калык пӧртэм кылын ке но вераське, соос ог-огзэс валало, шӧдо. Соин, вылды, кырӟасьёс-эктӥсьёс но учкисьёс гала-концерт бере люкиськыны ӧз дыртэ. Нош удмуртъёс Вуж Варяше люкаськизы на. Отын Башкортостанысь удмуртъёслэн НКЦ-зылэн кылдэмез дырысен 20 ар тырмонлы но Янаул ёросысь удмурт огазеяськонлэн 25 ар тырмонэзлы сӥзем ужрад ортчиз.