Пӧртэм сэрегъёсысь удмуртъёсты огазея

Ижевскын «Удмурт Кенеш» огазеяськонлэн 25 ар тырмонэзлы сӥзем сӥё-дано ужрад ортчиз. Отчы Удмуртиысь, Татарстанысь, Марий Элысь, Свердловск но Киров улосвылъёсысь, Москваысь, Санкт-Петербургысь делегациос вуизы. Ужрадэ Башкортостанысь 16 адями пыриськиз.

Люкаськем калыклы тау карон кылъёссэс, сӥзёнъёссэс веразы Удмуртилэн Тӧроез Александр Соловьёв, Кун Кенешлэн тӧроезлэн воштӥсез Софья Широбокова, Россиысь Куд Думалэн депутатэз Алексей Загребин но мукетъёс.

Огазеяськонлэн азьвыл тӧроосыз Николай Мусалимов, Валентин Тубылов но Игорь Семёнов басьтӥзы «Удмурт Кенешлэсь» гадьпусъёссэ. Нош удмуртлыкез азинтонын усто тыршисьёс «Тау карон» гожтэтъёсын пусъемын. Вераны кулэ, та нуналэ Башкортостанысь удмуртъёслэсь но ӟеч ужзэс пусйизы. Озьы шаерысьтымы калыкъёслэсь кусыпъёссэс юнматонэ бадӟым кужым пыртэмез понна Россиысь Калыкъёслэн ассамблеязылэн данъян грамотаеныз пусъемын Янаул ёросысь удмурт огазеяськонэн кивалтӥсь Юрис Саитов. Нош Татышлы ёросысь Улысь Балтач школалэн директорезлы Людвиг Зидымаковлы удмурт калыклэсь сям-йылолъёссэ улӟытонэ но утёнэ бадӟым люкет пыртэмез понна Удмурт Элькунлэн Тӧроезлэн тау карон гожтэтэз сётэмын.

«Удмурт Кенеш» - удмурт калыклэн валтӥсь но азьмынӥсь огазеяськонэз. Со кылдытэмын вал удмуртъёслэсь шугъяськонъёссэс пӧртэм ӧръёсын сэрттон-пертчон, удмурт кылэз, сям-йылолъёсты утён но азинтон ужез нуон понна. Та нуналэ сӥё-дано кенешонэ люкаськемъёс 25 ар ӵоже ужамзылы йылпумъянъёс лэсьтӥзы, азьланяз сэрттоно-пертчоно ужпумъёссы сярысь вераськизы. Нош «Удмурт Кенеш» ассоциацилэн президентэз Т. В. Ишматова «25 муртъёс – удмуртлыкез азинтӥсьёс» акцилы йылпумъянъёс лэсьтӥз. Татьяна Витальевна анай кылэз, лулчеберетэз утён но азинтон понна сюлмысь тыршись 25 адямиосты дипломъёсын данъяз. Соос пӧлын луиз Ермекей ёросысь удмурт огазеяськонэн кивалтӥсь Анастасия Вождаева.