«Танцевальный марафон» йылпумъяськиз

15-тӥ толшорысен 1-тӥ тулыспалозь Татышлы ёросын туала хореографияя «Танцевальный марафон» фестиваль-конкурслэн муниципал этапез ортчиз. Ужрад онлайн-форматэн радъяськиз. Та нуналъёсы солы йылпумъянъёс лэсьтӥзы.

Гран-прилы кузё луиз «Виктория» хореографической образцовой ансамбль (кивалтӥсез А. Хайбуллина).

Кыкетӥ возрастной группаын вормисьёс пӧлын луизы улысь балтачъёс но калмияръёс. Улысь Балтач школаысь «Лобыкай» эктон коллективлы кыкетӥ инты сётэмын (кивалтӥсез Зинаида Шарафутдинова), Калмиярысь «Италмас» эктон коллективлы – куинетӥ (кивалтӥсез Ралия Фархутдинова). Ужрадэ пыриськемез понна сертификатъёсын пусъемын Улысь Балтач школаын дышетскись Эстелла Шаймиева (кивалтӥсез Евгения Гарифуллина) но Вылысь Татышлыысь 1-тӥ номеро школаысь «Вишенки» эктон коллектив (кивалтӥсез Динара Марданова).