Тужгес чебер гурт кытын меда?

Республикаын «Самое красивое село Республики Башкортостан» конкурс ялӥське. Сое «Совет муниципальных образований Республики Башкортостан» ассоциация радъя.

Конкурсэ пыриськыны быгато республикаысь сыӵе гуртъёс, кытын 5000-лэсь ӧжыт адями улэ. Гурт калык собрание люкаськыса кенешыны кулэ, пыриськоз-а гуртсы конкурсэ. Со сяна, муниципал администрацилэн конкурсэ пыриськыны ӵектонэз мед луоз на.

Туэ конкурс куинь этапен ортчоз. Нырысетӥ этап – завкаосты кутон. Со 1-15-тӥ гудырикошконэ радъяськоз. Заявка бордын луыны кулэ гуртлэн историез, калыкен кыӵе ужъёс гуртын быдэстӥськемын, туспуктэмъёс, видеоматериалъёс. Завкаез «Совет муниципальных образований Республики Башкортостан» ассоциацилэн исполнительной аппаратаз таӵе адресъя ыстоно: г. Уфа, ул. Тукаева, 46, каб. 221.

Кыкетӥ этап 1-20-тӥ куарусёнэ радъяськоз. Отчы пыриськозы финалэ потэм гуртъёс. Соослэсь видеопрезентациоссэс БСТ-ын возьматозы. Солы куара сётон радъяськоз.

Куара сётон йылпумъяськем бере, куинетӥ этапын, жюри нырысетӥ но кыкетӥ этапъёслы йылпумъянъёс лэсьтыса, вить вормисьёсты быръёз. Тунсыко соиз: конкурсной комиссия гуртлэн историезлы, калыклэн пӧртэм ужрадъёсы пыриськемезлы, пайдаё ужъёс быдэстэмезлы бадӟым саклык висъялоз.

Вормисьёс дипломъёсын но коньдон премиен данъяськозы. Конкурсын нырысетӥ инты утэм гурт вӧзы «Самое красивое село Республики Башкортостан-2019» стелла пуктэмын луоз.