Тукайлэн кылбуръёсыз пӧртэм кылъёсын чузъяськизы

Уфаын, Акмулла нимо БГПУ-ын, «Тукаевские напевы» республика конкурс-фестивальлэн очной турез ортчиз. Отчы, заочной турез ортчыса, кык удмурт нылъёс - Каймашабаш школаысь 7-тӥ классын дышетскись Елизавета Давлетова но Янаулысь Р. Гареевлэсь нимзэ нуллись школаысь 5-тӥ классын дышетскись Полина Садыкина ветлӥзы.

Елизавета туж тунсыко лыдӟиз Г. Тукайлэсь «Вордиськем музъемелы» кылбурзэ, кудзэ удмурт кылэ берыктӥз А. Диева. Нош Полина ӟуч кылын быдэсак «Шурале» поэмазэ вераз. Нылъёслэн кылбур лыдӟемзы жюрилы туж кельшиз. Соин ик соос ӧтемын вал та дышетсконнилэн бадӟым концерт залаз: выльысь учкисьёс азьын кылбуръёссэс вераны. Витьтон конкурсантъёс пӧлын нылъёс кыкетӥ степенё диплом утӥзы но кубоклы кузё луизы.