-17 °С
Салкым
Антитеррор
Вань иворъёс
Конкурсъёс
21 декабрь 2017, 12:37

«Анай кыл – со калыклэн лулыз, пӧртэм калыкъёсты эшъяськытӥсь выж»

Башкортостан – пӧртэм калыкъёслы узыр шаер. Туннэ республикаямы трос ужъёс быдэстӥсько, калык кылъёсты, культураез, сям-йылолъёсты утён но азинтон вылысь. Национально-культурной но историко-культурной центръёс но анай кылэз утён бордын трос ужало.

Башкортостан – пӧртэм калыкъёслы узыр шаер. Туннэ республикаямы трос ужъёс быдэстӥсько, калык кылъёсты, культураез, сям-йылолъёсты утён но азинтон вылысь. Национально-культурной но историко-культурной центръёс но анай кылэз утён бордын трос ужало.
РФ-лэн Конституциезлэн нуналаз Уфаын «Мой язык - язык дружбы» акция кутскиз. Сое республикаысь Культурая министерство радъя. Акция муниципалитетъёсын но радъяськоз, быдэс ар ӵоже кыстӥськоз. Отчы котькуд мылкыд карись пыриськыны быгатэ. Со понна вордскем кыл, шаер сярысь кылбур лыдӟоно, видео-презентациез официальной хештегъёсын (#мойязыкдружбы #Bashkortostanmkrb #роднойязык) «Вконтакте» группае ватсано. Котькуд толэзьлэн пумаз йылпумъянъёс лэсьтозы, кин тросгес «лайкъёс» люкам, со вормисе потоз. Вормисьлэн видео-презентациез республикаысь «Культурный мир Башкортостана» интернет-порталэ интыямын луоз.
Уфаын ортчем творчествоя форуме республикаысь историяя но культурая центръёсын ужасьёс, гожъясьёс, театръёсысь актёръёс, крезьгурчиос, кырӟасьёс сяна, студентъёс но школаосын дышетскисьёс пыриськизы. Ваньзы соос вордскем кылынызы шаер, анай кыл сярысь кылбуръёс лыдӟизы. Удмуртъёслэн историяя но культурая центрысьтызы валтӥсь ӧнерчи Ирина Самигулова ужрадэ Эмиль пиеныз вуылӥз. Соос «Дуно удмурт кылы» кылбур лыдӟизы (авторез И. Самигулова).
Ужрадэ пыриськемъёслы тау кылъёссэ вераса, Башкортостанысь Калыкъёслэн ассамблеяенызы кивалтӥсь, Кун Думалэн депутатэз Зугура Рахматуллина шуиз:
- Анай кыл – со калыклэн лулыз, пӧртэм калыкъёсты эшъяськытӥсь выж. Ми асьме кылмес яратыны, гажаны, утьыны кулэ.
Форумын ИКЦ-ослэн ар ӵоже быдэсъям ужъёссы сярысь но вераськизы. Историяя но культурая центръёсысь ӧнерчиос ортчытэм ужрадъёссы пумысен малпанъёссэс, мылкыданъёссэс веразы, вуоно арлы ужпумъёс пуктӥзы. «Лучший историко-культурный центр – филиал ГБУ ДДН РБ» конкурслы йылпумъянъёс но лэсьтэмын. Удмуртъёслэн историяя но культурая центрзы «Самое актуальное мероприятие (событие)» номинациысь дипломлы кузё луиз.
- Номинациен пусйыкузы, «Усточикарлэн» ужезлы валтӥсь инты висъямзы сярысь веразы. Нылпиос, егитъёс понна дасям декоративно-прикладной творчестволы сӥзем ужрадъёслы вылӥ дунъет сётӥзы, - вера И. М. Самигулова.
Янаул ёросысь школаос но «Мой язык – язык дружбы» акцие азинлыко пырисько. Кылсярысь, Максим школаын ужась дышетӥсьёс-языковедъёс вордскем кыллы сӥзем «Языки дружбы» ужрад дасяллям. Школаен кивалтӥсьлэн воштӥсез Ленария Магданова верамъя, дышетскисьёс калык дӥськутъёс дӥсяса, удмурт, бигер, башкир но ӟуч кылъёсын кылбуръёс лыдӟиллям, кырӟанъёс быдэстӥллям, эктонъёс возьматӥллям. Со сяна, нылпиос ёросазы улӥсь калыкъёслэн сям-йылолъёсынызы но тодматскиллям.
- Школаын радъяськем конкурсын 8-тӥ классын дышетскись Арнолия Идиятова висъяськиз. Со Ашальчи Окилэсь «Вордӥськем музъеме» кылбурзэ вераз, - шуэ нылашез ужрадэ дасям дышетӥсез Ленария Хабибзяновна. Собере Арнолия ёросазы радъяськем конкурсын быгатонлыкъёссэ возьматэм. Конкурсэ Каймашабаш школаысь 7-тӥ классын дышетскись Елизавета Давлетова но пыриськем. Ужрадэ сое гуртысьтызы библиотекарь Г. Д. Байназарова дасям. Елизавета Алла Кузнецовалэсь «Мон - удмурт» кылбурзэ быгатыса верам.
Миляуша БУЛАТОВА.
Читайте нас в