«Урал-батыр» удмурт кылын чузъяськиз

Шуркынмон толэзьлэн пумаз Уфаын «Урал-батыр» башкир калык эпосэз быдэстонъя калыккуспо конкурс ортчиз. Туэ со тямысэтӥ ползэ радъяськиз. Отчы 300-лэсь трос дышетскисьёс но студентъёс пыриськизы. Соос башкир музъемысь но Россия Федерацилэн пӧртэм регионъёсысьтыз, Франциысь, Индиысь, Монголиысь, Израильысь, Афганистанысь вуизы. Соос пӧлын Татышлы ёросысь Вязовкаын улӥсь, Вылысь Татышлыысь нырысетӥ номеро школаын 10-тӥ классын дышетскись Мариалина Нуриахметова но луиз. Эпосэз удмурт кылын быдэстыса, конкурсысь со кыкетӥ интыен берытскиз. Ужрадэ сое удмурт кылъя дышетӥсез Лира Биктимирова дасяз.

- Та нуналэ «Урал-батырез» 42 пӧртэм кылъёсын быдэстӥзы. Эпослэсь люкетсэ удмурт кылэ Лира Файзыровна берыктӥз. Та конкурсэ мон кыкетӥ ползэ пыриськи, кылем арын дышетӥсе Люция Ахунзяновна Хазипова дасяз вал, - вера Мариалина. – Мон туж шумпотӥсько, Башкортостанын сыӵе бадӟым конкурс радъяське шуыса. Ужрадэ вуэмъёс эпосэз пӧртэм-пӧртэм кылъёсын кылзо.

Конкурсэ вуэмъёс понна 25 секциос ужазы.

- Милям секцимы «Языки народов РБ и мира» нимаськиз: «Урал-батырез» азербайджан, армян, киргиз, казах, пор, чуваш, бигер, чечен но удмурт кылъёсын лыдӟизы. Мариалина 25 конкурсантъёс пӧлын кыкетӥ степенё дипломлы кузё луиз. Ми понна со - туж бадӟым шумпотон, бадӟым вормон. Эпослэсь люкетсэ веран сяна, Мариалина крезен шудыса но возьматӥз. Вакчи дыр куспын крезен шудыны сое атаез дышетӥз. Со понна Фанил Нуриахметовлы бадӟым тау кылъёсме верасько, - ужрад сярысь малпанъёссэ шараяса вера Л. Ф. Биктимирова.

Миляуша НИГАМАТУЛЛИНА.

Татышлы ёрос.