Егит гожъяськисьёсын пумиськон – улон шоры выль сямен учкон

Пумиськонмылэн мугез луиз егит финн-угор кылбурчиосын но гожъяськисьёсын пумиськон, кудъёсыз газет улонэн ӟеч тодмо. Та нуналъёсы удмурт шаерын «Палэзян» фестиваль ортчиз. Ужрадэ пыриськисьёс пӧлын егит гожъяськисьёс но луизы. Редакциын Марий Элысь вуэм кылбурчи Вера Гордеева асьсэлэн ужъёсынызы тодматӥз. Али дыре со ачиз туризмъя комитетын ужа, азьвылгес «Кугарня» газетын тыршем. Нош кылбуръёс гожъяны пичи дырысеныз ик кутскем, собере быгатонлыксэ студент аръёсаз азьланьтэм. Монэ солэн «ву вылэ кылизы пытьыос...» шуэм малпанэз паймытӥз. Та нуналэ озьы ик Коми шаерысь Татьяна Шахова лыктэмын вал. Со «Эхо Пармы» газетын ужамын, али калыклы улон-вылонын юрттэт сётон бордын тырше. Ку мылкыдыз гожъяськыны кыске – соку пӧрмыло солэн кылбуръёсыз. Гожъямъёсыз пичиослы но дышетскисьёслы сӥзем «Би кинь» («Тылгизьы») журналын но егитъёс понна потӥсь «Йолога» («Шуккиськись куара») газетын коми кылын пото. Со сяна, пумиськонэ Мордовиысь Алина Подгорная лыктэмын вал. Со «Сятко» («Тылгизьы») журналлэн редакторез луыса ужа. Та журналэз соос эрзя кылын потто. Удмуртъёс пӧлысь ужрадын Анна Бурдина луиз. Туж шуныт кылъёс Дарали Лели сярысь веразы. Солэн «Удмурт дунне» газетын туж тунсыко но тодмо луись «Ингож» рубрикаез вань.

Егит гожъяськисьёс асьсэ ужъёссэс мукет финн-угор кылъёсы берыктыны тыршо на. «Удмурт дунне» газетлэн валтӥсь редакторез Зинаида Кириллова со пумысен аслэсьтыз малпанъёссэ вераз.

Котькыӵе тунсыко пумиськонъёс ческыт чай юон йылолэн йылпумъясько. Мон но редакциын егитъёсын ӵош чай юи. Собере ми Елена Миннигараеваен улон шоры учкон амалъёс, мынам ужъёсы но малпанъёсы сярысь вераськыса пукимы на.

Таӵе пумиськонъёс котьку ик выль малпанъёсы вутто но котькуд тунсыкъяськисьлы выль бурдъёс сёто. Оскисько, азьпалан нош ик егит усточиосын пумиськылыны шуд кылдоз на.