Выль арын малпанъёс быдэсмо

Выль арын малпанъёс быдэсмо-а? Быдэсмо. Выль ар котькинэ выжыкылэ вуттыны быгатэ. Тол бабайлы сюлмысь осконо гинэ.

Дас вить ар ӵоже ни Уфаысь «Фонд развития города» огазеяськон творческой нылпиослы «Письмо Деду Морозу» проект радъя. Отчы республикаысьтымы котькуд мылкыд карись пинал ӟеч ужъёсыз сярысь гожтэт ыстыны быгатэ. 2017-тӥ арын, кылсярысь, проект республикамылэн 100 ар тырмонэзлы сӥземын вал. Проектын вормисьёсты 6-тӥ толшоре Уфаысь культурая двореце Рождественской ёлкае вазизы. Милемлы но пиеным отчы вуылыны шуд усиз. Дворецлэн фойеяз шудон площадкаос, суредаськонъя, лэсьтӥськонъя мастерскойёс ужазы. Тол бабайлэн Секретной службаяз ужасьёс нылпиослэсь мылкыдзэс ӝутон понна мар гинэ ӧз каре! Пичиосын ӵош шудӥзы но, эктӥзы но, суредаськизы но, шарикъёслэсь пӧртэм-пӧртэм пӧйшуръёс пӧрмытъяса нылпиослы кузьмазы но мукет. Нош Тол бабай котькуд пиналэз гожтэтэныз но кузьымъёсыныз шумпоттӥз. «Тол бабай монэ Уфае ёлкае вазиз, ческыт кузьымъёс сётӥз, небыт шудон – кучапи, кинотеатре билет кузьмаз. Мон солы анайлы, атайлы, песяен песятайлы юрттӥськеме сярысь гожтэт лэзи вал. Праздник туж шулдыр, тунсыко ортчиз», - ужрадэ вуылэмез сярысь эшъёсызлы шумпотыса маде Альмир.

Тросэз нылпиос та ёлкае нырысьсэ вуиллям вал. Ужрадысь соос ваньзы одӥг малпанэн бертӥзы – таяз арын но ӟеч ужъёс лэсьтыса, со сярысь Тол бабайлы гожтыны но вуоно выль арын нош ик шулдыръяськонэ лыктыны.

Миляуша БУЛАТОВА.