Пудо утён ӧрез быръемъёс ӵошатсконэ пыриськизы

Конкурс Крупская нимо СП ООО-ын ортчиз. Ӵошатсконэ пыриськисьёс кык этапъёсты – теоретической но практической - пыр потоно луизы. Уженызы герӟаськем юанъёсын тест ужамзы бере, скал кыскисьёс скал кыскон аппаратэз сэрттонын но люканын устолыкенызы, ӝог луэменызы паймытӥзы. Кожалод, та ужез соос кынем синмын быдэстыны быгатозы. Собере соосты скал кыскон уж витиз. Вуттэм йӧллэсь чылкытлыксэ но эскеризы. Судьяос со понна нимысьтыз баллъёс ватсазы.

Скал кыскисьёс пӧлын вормисьёсты кык категориын бырйизы. Егит ужасьёс пӧлын 1-тӥ интыын луиз Крупская нимо СП ООО-ысь Галия Гарифуллина. 2-тӥ интые потӥз «Дэмен» ООО-ысь Снежанна Суфиярова, куинетӥе – «Рассвет» СПК-ысь Ганна Гилимшина.

Кыкетӥ категориын  вормисе потӥз «Колос» ООО-ысь Фларида Шаймуратова. Кыкетӥ но куинетӥ интыосын луизы «Урожай» СПК-ысь Эльвира Миназтдинова но «МарсАгро» ООО-ысь Тахмина Гималтдинова.

Скал кыскисьёслэсь сяна, ужрадын осеменаторъёслэсь, зоотехникъёслэсь, фермаен кивалтӥсьёслэсь визьзэс сыназы. Осеменаторъёс пӧлын удмурт хозяйствоосын ужасьёс но висъяськизы: «Агро-Танып» СПК-ысь Ольга Муратшина 2-тӥ интылы кузё луиз, «Рассветысь» Василий Садриев - куинетӥ интылы. «Агро-Танып» СПК-ысь фермаен кивалтӥсь Вячеслав Шайсултанов но конкурсысь 3-тӥ интыен бертӥз. Со хозяйствоысь ик Анна Семёнова «Самая молодая участница конкурса» номинацилы кузё луиз. Вормисьёсты дипломъёсын но сертификатъёсын пусйизы.  

Конкурсэ вуэмъёс понна та нунал праздник выллем луиз. Уго котыре шулдыр крезьгур, кырӟанъёс вӧлмизы, шудонъёс радъяськизы. Со сярысь сюлмаськизы интыысь культура юртын ужасьёс.