«Аслэсьтым интыме вордскем палъёсысьтым шедьтӥ"

= Агроном =

Александр Гарифьянов пичиысен ик бусыын веттаськись ю шеплэсь дунзэ валаса будӥз. Варяшбашысь, Выль Артаулысь школаосы нуись сюресъёс бусыос пыр ортчылӥзы угось. Куддыръя отын вазь ӵукна ик, пиналъёсты дышетскыны келяса сямен, трактор гуретэм куараос кылӥськылӥзы. Ӝытазе но соос калыкез пумиталлязы на. Та вакытэ Александр Рахимьянович ӧз но малпаськы, вылды, солэн но улонэз азьланяз паськыт бусыосын герӟаськоз шуыса. Школаын дышетскисьлэн йырыз соку пӧртэм малпанъёсын тырмемын вал. Но, вераны кулэ, Александр Гарифьянов армиысь бертэмез бере Омск городын агрономлы дышетскиз.

«Агрофирма «Урада» ООО-ысь валтӥсь агрономен но бригадирен (Александр Гарифьянов огӵош кык ужезнуэ) тужгес пӧсь нуналъёсаз – сӥзьыл ю тысь октон вакытэ – пумиським. Соин, вылды, солэн ӧжытак пӧсекъямез но шӧдӥськиз. «Комбайнъёсты бусые келяськомы. Ю-нянь вуэмын. Шулдыр куазен ужъёсты быдтыны тыршоно», - мылкыдзэ усьтӥз со. Гурт удысын тыршисьёс понна ю-нянь октон туэ капчиен ӧз сётӥськы. Соин соос котькуд шулдыр нуналэз пайдаен кутӥськыны тыршизы. «Гужем шутэтскыны дыр уг шедьы, бусы ужъёс ог-огзэс воштыса уло. Со куспын куддыр техника но сӧриськыны шедьтэ яке ужась утчано луэ», - малпанъёсыныз люкиське агроном. 

Александр Рахимьяновичлэсь кылъёссэ юнматыса сямен, вераськыкумы олокӧня пол телефонэз жингыртӥз. Агроном котькинлы лад-лад валэктон сётыны тырше. Солэн кылъёсаз зӥбыт сямыз, быръем удыссэ гажамез шӧдӥськиз. «Бусые вазё», - шуиз со берло, вераськонмес азинтыса. Со куспын Александр Рахимьяновичез тодэ ваёнъёсыз ортчем аръёсаз берыктӥзы кадь. Со паськытэсь бусыоссэ валэн, собере мотоциклэн котыръямзэ син азяз пуктӥз. Нош табере со ужасьёсыз доры «Нива» машинаеныз вуылэ. Корт эшез ужзэ трослы капчиятӥз. «Хозяйствомы туннэ юн возиське, - вера со. – Кылсярысь, Т-150 трактор, комбайн басьтыны быгатӥмы. Хозяйствоямы туннэ огъя куать комбайнмы лыдъяське. Туала вакытэ вуж техникаосын азьпала уд мыны ни». Александр Рахимьяновичлэн 2004-2005-тӥ  аръёсы ужамез тодаз лыктӥз. Со понна соос тужгес секыт луиллям. Соку хозяйствозы лябгес луэм, трактор-комбайн басьтыны луонлыксы вылымтэ. Соин вуж техникаоссэс вужъёсыныз «кышъяса» ужано луиллям.

Александр Гарифьянов гурт удысын выль адями ӧвӧл бере, амалтэк пӧртэм аръёсты ӵошатоно луэ. Тани сооскуке но «Буйский» совхозын тыршизы, собере люкиськизы. Уждунтэк тыршем аръёссы но луизы. Табере югдурзы шӧдскымон воштӥськемын. Уждун но дыраз басьто, турынэн, ю тысен но шугъяськонъёссы ӧвӧл. «Агрофирма «Урада» ООО-лэн бусыосыз ӟечлыкенызы сокем уг висъясько ке но, ю-няньзы хозяйствозылы но, ужась калыклы но тырме. «Туэ ю тысьмылэн удалтонлыкез гектарысьтыз 20 центнер усиз, - вера агроном. – Горд сюйын сомында ю-нянь будэтыны быгатэммы бере, ми понна со бадӟым вормон». Нош кукурузазы пӧлын ватӥськыса шудыны луысал. Пудо сиёнзы агрономлэсь кык поллы ӝужытгес будэм.

= Тазалыкез кыдатон =

Александр Рахимьянович 1961-тӥ арын вордӥськемын. Но лапеггес мугоро пиосмурт шоры учконо ке, со аресэзлэсь трослы егитгес адӟиське. Тракторъёс котырын со егитъёс сямен шаплы бызьылэ. Пиосмуртлэн егит дыръяз спортэн эшъяськемезлэн пытьыосыз али ке но шӧдӥсько. «Дасэтӥ классэз Выль Артаулын быдтӥ, - тодаз вае со. – Дас иськем сюресэз пыдын, велосипедэн ортчылӥ, нош толалтэ – куасэн. Трос пол куасэн бызьылонъя ёрос ӵошатсконъёсы пыриськылӥ, вормисьёс пӧлын луылӥ». Александр Рахимьянович пинал дырыз сярысь трос шуныт тодэ ваёнъёсыныз люкиськиз. Нош куасэн герӟаськем вормонэз сярысь со берло гинэ шара поттӥз. Александр Гарифьяновлы куасэн бызьылонъя нырысетӥ разряд сётэмын. Пиосмурт али ке но тол куазен куасъёсыныз уг люкиськы на. Зэм, табере со ӵошатсконъёсы у гпыриськылы ни. Тазалыксэ юнматон понна гинэ куас вылэ султылэ. Трос дыръя сооскузпалыныз ӵош инкуазе потало. «Гужем куддыр доре бертыны но дыр шедьтыны уг луы, нош толалтэ со ласянь каньылгес. Хозяйствоын ужъёс ӧжытгес луо», - вера со пумысен агроном. Берло Александр Рахимьяновичлэн мукетыз тунсыкъяськонэз сярысь но тодӥ. Пинал дыръяз со классической амалэн нюръяськонэз яратэ вылэм.  Но пумен тазалыкез лябомыны кутскем, соин нюръяськонэн люкиськоно луэм. «Служба Средней Азиын ортчиз. Отын нюръяськыса Туркестан округъя куинетӥ инты басьтӥ», - вера со. Гуртазы сабантуйёсын но вормисьёс пӧлын луылэм.

* * *

Александр Рахимьяновичлэн улонэзлэн бадӟым люкетэз ужлы сӥземын. «Аслэсьтым интыме вордскем палъёсысьтым шедьтӥ, - шуэ со. – Мӧйымемъя куддыр жадёно. Озьы ке но сюлэм уж дуре куриське. Бусыостӥкотырскиськод но, лул-мугорын каньылак луэ. Бадӟым шепъёсын веттаськись ю-нянез адӟыса валаськод, со борды тынад но люкетэд пыртэмыншуыса».