Выль ужан амалъёсты ужазы куто

Татын выль ужан амалъёсты ужазы куто. Хозяйствоен Сергей Ханов кивалтэ. Куке но секыт югдуре шедем хозяйство туннэ йыгмыт вамышъёсын сюрессэ азьланьтэ. Тулыс кизён-а, гужем пудо сиён дасян-а, сӥзьыл ю тысь октон-а – таныпъёс котьку нырысетӥос радын. Хозяйстволэн шыкысаз Данъян грамотаос, дипломъёс уно люкаськемын. Та вормонъёс бордын - кивалтӥсьлэн ужзэ быгатыса радъямез но хозяйствоысь ӧнерчиослэн, ужасьёслэн ужзэс тодыса, йылаз-пумаз вуттыса быдэсъямзы. Соос арлы быдэ ас азязы валтӥсь ужпум пукто – ужасьёслы уждун но налогъёсты дыраз тырон сяна, кыӵе ке но бадӟым уж борды басьтӥськоно.

2020-тӥ арын «Агро-Танып» СПК-ын бадӟым уж лэсьтэмын: хозяйство аслаз кужыменыз кызь кык миллион манет тыр выль технологиосъя ферма – каркасно-тентованной ангар - ӝутӥз. 124 метръем ангар канадской технологияя лэсьтэмын. Со 320 йыр пудолы чакламын. Ферма кык люкетъёслэсь сылэ. Кылем арын таныпъёс доильно-молочной блок ӝутӥзы.

Выль ферма озьы малпамын – татын пудоосты думетэ уг интыяло. Сиён кормораздатчикен пырто. Пудоослы ву юон интыос тупатэмын. Ангар азьын – силослы но сенажлы гуос. Соос пудо утисьёслы ужаны каньыл, капчи мед луоз шуыса ферма вӧзы лэсьтэмын.

Туннэ нуналэ «Агро-Танып» хозяйстволэн одӥгаз фермаяз тупатъян ужъёс мыно. Фермалэн зданиез сизьымдонэтӥ аръёсы ӝутэмын вылэм. Азьло татын скалъёсты думыса утё ке вылэм, ремонт бере думетэ уз интыялэ ни. Татчы сю сизьымдон йыр ветылъёсты пыртозы.