Конкурс усто ужасьёсты шараяз

Конкурсэ ёросысь хозяйствоосын ужась скал кыскисьёс, осеменаторъёс, зоотехникъёс, фермаосын кивалтӥсьёс вуизы. Шулган музъем соосты пумитаз. Ужрадэ Татышлы ёрос администрациен кивалтӥсь Фанур Шайхисламов но пыриськиз.

Конкурсэ лыктэмъёслы теорияя но практикая тодон-валанъёссэс возьматоно луиз. «Туннэ нуналэ пудо вордон удысын  ӧнерчиослэн, ужась киослэн тырмымтэзы зол шӧдӥське. Соин та выллем конкурсъёсты радъяно. Малы ке шуоно конкурс тодон-валанъёсты будэтыны, ужан амалъёсын люкиськыны юрттэ», - вера Татышлы ёросысь гурт хозяйствоя управлениысь валтӥсь зоотехник Ильдар Булатов.

Вормон кинъёслы пальпотӥз?

Скал кыскисьёс пӧлын вормисьёсты кык возрастной группая бырйизы: «старшая возрастная группа» но «младшая возрастная группа». Нырысетӥ группаын вормисе потӥз «Агро-Танып» СПК-ысь Снежана Файзырова, «Рассвет» СПК-ысь Елена Хабибуллина куинетӥ интылы кузё луиз. Кыкетӥ группаын удалтӥз «Дэмен» но «Рассвет» СПК-осысь скал кыскисьёслы: Снежана Суфиярова кыкетӥ луиз, Ганна Гилимшина – куинетӥ. Вераны кулэ, скал кыскисьёс пӧлын пиосмуртъёс но вань вал. Кылсярысь, «Дэменысь» Фагим Садртдиновез нимысьтыз кузьымен пусйизы.

Осеменаторъёс пӧлын кыкетӥ интыын луиз «Агро-Танып» СПК-ысь ГалинаФархутдинова, куинетӥ – «Рассвет» СПК-ысь Василий Садриев. «Самый молодой оператор по искусственному осеменению» номинацилы кузё луиз «Дэмен» СПК-ын ужась Рамис Яппаров.

Конкурсын зоотехникъёс но «нюръяськыны» мылкыд каризы.Вормисе потӥ Крупская нимо ООО-ысь Тимур Бадертдинов. Кыкетӥ луиз «Колос» ООО-ысь Вадим Ахметов, куинетӥ – Амиров нимо СПК-ысь Рамиль Гаязов.

Вормисьёсты дипломъёсын но кузьымъёсын данъязы.