Муш кадь ужась Шаритдиновъёс

1982-тӥ арын Тюльдиысь школаез йылпумъяса, Флюр Шаритдинов Уфа вӧзысь «Михайловское» СПТУ-э дышетскыны пырем. Со дыре отын мушкасьёсты, бакча но сад будэтӥсьёсты дасяло вылэм. Флюр Михайлович муш утён ӧрез быръем. Армие мынытозяз теорияя тодон-валан люкам. Службаез бере Бирскысь МПМК-лэн муш бакчаяз практика ортчем, мушкасьлэн юрттӥсез луэм. Егит ӧнерчилы отчы ик ужаны кыльыны ӵекто вылэм, солэн сюлмыз вордӥськем палъёсаз куриськем. 1985-тӥ арын Ленин нимо колхозлэн муш бакчаяз ужаны кутскем. Яратоно ужаз со йырыныз-пыдыныз выем, шуыны луоз. Муш бакчалы инты но ачиз быръем. Отчы омшаник, пичигес корка пуктэм, улмопуос мерттылэм, тымет но лэсьтытэм. Егит мушкасьэн ӵектэмезъя, нюлэс вӧзысь бусые чечы сётӥсь культураос кизьыны кутскиллям.

- Укмыстонэтӥ аръёсы улон огыр-бугыр луиз. Нимысьтыз предприятиос кылдылыны кутскизы. Фабрикаос, заводъёс но частникъёс кие выжизы. Гурт хозяйствоын нырысьсэ фермер хозяйствоос кылдӥзы. Соин мон но ас поннам ужаны малпай. Колхозын 8 ар ужам бере, 1993-тӥ арын, ужысь кошконо кариськи. Мон ужаны кускыку колхоз пасекаын 13 йыр муш лыдъяське вал, нош кошкыкум – 100 йыр, - тодаз вае Флюр агай.

Флюр Михайлович нимысьтыз ужбергатӥсь луон сярысь но малпаськымтэ, фермер хозяйство но кылдытымтэ - аслаз садаз гинэ мушъёсты утялтэм.

- Вить йырысен кутски но куамын вить йырлы вуттӥ. Собере бакча бере пасека лэсьтыны кутски. Сизьым ар тырши кутскем уже бордын, - вера Флюр Михайлович. – Нырысь кык метръем кенер кутӥ. Собере котыраз пӧртэм писпуос мерттылыны кутски. Пӧлазы пирамидальной топольёс но вань. Нош пушказ улмопуос мерттылӥ, ачим прививать карылӥ. Малы ке но басьтэм улмопуос толалтэ кынмо вал. Али муш бакчаямы 40-лэсь трос улмопуос будо, тулыс сяськаенызы, сӥзьыл емышъёсынызы шумпотто. Мон та уже борды басьтӥськыку, гуртамы муш утисьёс туж ӧжыт вал. Али трос ини.

Быръем ужзэ азинтонын Флюр Михайловичлэн кивоштӥсез но юрттӥсез луэм Алина кузпалыз, собере ини - нылпиосыз. Бадӟым пизы, Андрей, но Нэля нылзы пичиысен, пе, мушъёсын огкыл шедьтылӥллям. Артём пиезлы Флюр агай вордӥськем нуналаз мушъёсын уморто кузьмам. Озьы Артём но семьяезлэн ужаз кыстӥськем.

- Туннэ нуналэ муш утён сярысь книгаос трос, интернет но ки улын. Соосын пайдаяськиськоды-а? – юасько Флюр Михайловичлэсь.

-Лыдӟисько, кызьы, пе, сотэк. Мукет шаеръёсысь муш утисьёслэн ужан амалъёсынызы тунсыкъяськисько: кызьы утё, кыӵе луонлыкъёс кылдыто.Но книгаын гожъямъёсъя гинэ ужаны уг луы. Котькуд мушкасьлэн аслаз ужан амалэз, шуом, секретэз луэ, - валэктэ Флюр агай.

Шаритдиновъёс пӧртэм конкурсъёсы но, адӟытонъёсы но трос пол вуылӥллям ни. Соослэсь продукцизэс котьку тунсыкъяськыса, пе, учко-эскеро.

Фото: Калтасинская Заря