«Мыным вордскем гуртэ, музъем уж туж матын»

- Мон КФХ кылдытыку, ёросамы фермеръёс ӧй вал на. Соин трос секытлыкъёсын пумиськоно луиз. Юристъёс дортӥ трос ветлӥ, ужкагазъёсты шонер лэсьтон вылысь, - вера Г. Гильмаутдинов. – Малы фермер хозяйство кылдытон малпанэ вордӥськиз шуоды? Малы ке шуоно колхозмылэн умой вуоноез ӧй вал ни. Нош гурт калыклы уж кулэ.

Аръёс ӵоже Г. Гильмаутдинов гурт удысын тырше. Со гурт калык понна уж интыос кылдытӥз. Та дыре Геннадий Аскаровичлэн КФХ-ез ёросазы азьмынӥсь хозяйствоос пӧлын лыдъяське. Кылем арын Бурай ёрос сабантуйын солэн КФХ-ез сярысь трос шуныт кылъёс веразы: тулыс бусы ужъёсты быдэстонын байшадыос нырысетӥ интыын луизы. Г. Гильмаутдиновлэн 1040 гектар гыроно-кизёно музъемез, 11 тракторез, вить комбайнэз. Хозяйствояз 200 йыр ыжъёс, сизьымдонлы матэ валъёс лыдъясько. Тулысысен сӥзьылозь со дорын кызьлы матэ адями ужа.

- Гужем ыж басьтӥсьёс трос. Вал курыса вазиськисьёс но ӧжыт ӧвӧл. Адямиос али азьло кадь пудо уг утё ни угось,- шуэ Геннадий Аскарович.

Геннадий Аскаровичлэн ужаз юрттӥсьёсыз – семьяез. Зульфия кузпалыз, пиез но кенэз котькыӵе ужын юрттэт кизэс сётыны, пе, дась. «Бусы ужъёс кутскем бере ужасьёслы лымшоре сиён пӧзьтоно. Та уж Зульфия вылын. Гужем Уфаысь кенмы но юрттӥськыны бертэ», - вера ужбергатӥсь.

Фермер хозяйствоен кивалтӥсез гуртаз пумиськись ужпумъёс но сюлмаськыто. Толалтэ урамъёсты усьтон со вылын. Байшады гуртысь нылпиос Татышлы ёросысь Акбулат школаын дышетско. Со гуртэ нуись сюресэз утялтон сярысь но Геннадий Аскарович сюлмаське.

Гуртазы ортчись пӧртэм ужрадъёсын но со коньдон юрттэт возьматытэк уг кыльы.

- Гуртамы ФАП, клуб ужало. Вакытаз клубмы но ворсаськем вал, - тодаз вае Геннадий Аскарович. Сое выльысь усьтон вылысь но Геннадий Аскаровичлы ветлоно луэм. Куке но вунэм гурт вӧсьсэс улӟытонын но Г. Гильмаутдиновлэн люкетэз бадӟым.

- Пересь песяй-песятайёсмы гуртын вӧсь ортчыто вылэм. Собере со йылол 49 арлы вунэмын вал. Гурт вӧсез усьтон понна Бальзюгае Назип агай доры ветлӥм. Сое Байшадые вайыса, со йылоллэсь радлыксэ валэктэмен, гуртамы вӧсь ортчытъяны кутским,- вера Г. Гильмаутдинов.

Геннадий Аскаровичлэн азьланезлы малпанэз – кутскем ужзэ азинтон. «Мыным вордскем гуртэ, музъем уж туж матын. Байшадылэсь палэнын мынам улэме уз луы,- шуэ со. – Кужым вань дыръя вордскем музъемам ик ужало. Тазалык гинэ мед луоз».

Статистикалэн лыдпусъёсызлы осконо ке, кылем арын гурт удысын вуз поттонын Башкортостан вылӥ лыдпусъёс возьматӥз. Татын Бурай ёросысь гурт удысын тыршисьёслэн но люкетсы вань. Соос пӧлын ик- Г. Гильмаутдиновлэн КФХ-ез.