+20 °С
Салкым
Антитеррор
Вань иворъёс
Гурт удыс
28 куартолэзе 2020, 22:45

Ӟырама, алма, кэрткэ…

Таӵе йыръянэз лыдӟыса, Башкортостанын улӥсьёс соку ик валалозы, дыр, ма сярысь гожтэмын. Нош кин ке тодмотэм кылъёс шуыса учкоз. Камсьӧр удмуртъёс одӥг бакча емышез пӧртэм кылъёсын нимало. Кылпум картофка сярысь. Куартолэзьын огез бадӟым сюлмаськонмы – бакчаосамы картофка мерттон. Короновирусэн сэрен вордскем гуртам палэнысен (дистанциысен) ужаса, мыным но та уже пыриськыны кылдӥз. Пичияк этнографической эскерон но быдэстыны быгатӥ.

Мынам вордскем Кисса (Касиярово) гуртын (Бурай ёрос) сое ӟырама/ӟыралма шуо. Со бигер кылэн валэктӥське: «җир алма» – удмурт кылын «му яблок» шуэмез возьматэ. Но гурт котырысь башкиръёс но бигеръёс картофкаез бәрәңге шуо. Таӵе ним кылдӥз, дыр, гуртысь удмуртъёсты та емышен нырысьсэ тодматыкузы. Соослы картофка сярысь бигер кылын валэктӥзы, луоз. Бурай ёросысь сарсазъёс но Балтач ёросысь шавьядыос но картофкаез киссаос выллем ик нимало: соос та гуртысь кӧчемъёс.
Тросэз камсьӧр удмуртъёс картофкаез алма шуо, со бигер кылын «яблок» шуэмез возьматэ. Та кыл кутӥське унояз Янаул, Татышлы, Балтач но Бурай ёросъёсысь удмурт гуртъёсын. Солы матын луэ Татарстанысь Бавлы ёросысь но Ермекей ёросысь Куктянай гуртысь удмуртъёслэн уммо шуэмзы. Озьыен, картофкаез таос но яблок ик шуо, «му» кылзы гинэ усем.
Нош Бурай ёросысь Алтау гуртын та яратоно сиёнэз кэрткэ шуо. Шугъяськытэк валаны луэ, та кыл ӟучъёслэсь асэстэмын шуыса. Алтауъёсты та емышен тодматыкузы ӟуч нимзэ ик вераллям, дыр. Калтасы ёросысь удмуртъёслы картофка булгы нимын тодмо, нош Кушнаренко ёросысь канлыос сое гыльба шуо. Соос нырысь ик та сиён емышлэн бульба нимыныз тодматскиллям вылэм, дыр, та кыл али дыре белорус кылын кутӥське. Куд-огаз гуртъёсын, кылсярысь Бурай ёросысь Дэулэкэнын, сое бигеръёс сямен ик бэрэнге шуо. Валаськом – со асэстэм кыл луэ шуыса. Озьыен, та бакча емышлэн нимъёсыз гинэ но туж аспортэм…
Историысь тодӥськомы, асьме шаерын картофкаез XIX даурлэн пумазгес будэтыны кутскизы шуыса. Со пумен сяртчыез воштӥз. Нырысь ик картофкаез бусые мертто вылэм. Удмуртъёслэсь та бакча емышен бер тодматскемзэс сое «удмурт сиёнэн» лыдъямтэзы но солэсь вӧсь нергеос дыръя пӧраськымтэзы возьматэ. Но 1930-тӥ аръёсысен картофка удмуртъёслы но Россиысь мукет калыкъёслы «кыкетӥ нянь» луиз. Али но гурт улосэз картофкатэк син азе пуктыны уг луы. Соин ик сое мерттонлы но бадӟым саклык висъяло, солэн ас йылолъёсыз но вань.
Киссалан но ӟырама мерттон бадӟым ужен лыдъяське. Сое ӵыжы-выжыосынызы ӵош вемеен черодэн ог-огзы дорын мерттыло. Бакчае потыкузы, ӝӧк вылэ «Ӟырама мед далтоз!» шуыса тыр нянь поныса кельто. Та возьматэ быдэстоно ужлэсь бадӟымлыксэ. Мерттонъязы кузё кышно ужасьёссэ одно ик пӧзьтэм винаен секта. Юыкузы мерттоссылы удалтон сизё. Ужакузы вераськонзы тросгес картофка мерттон, будэтон но октон сярысь луэ. Ужзы йылпумъяськем бере тунсыко йылол быдэсто. Музъемлэсь кужымзэ басьтыны шуыса, ваньзы муз вылэ я ведра вылэ лымшор пала учкыса ӧжытаклы пуксё. Бурай ёросысь Байшадыын алма мерттонзы йылпумъяськем бере, парен пуксьыны, пе, кулэ, пиосмуртэн нылкышно. Нош Татышлы ёросысь Вукогуртын, ужзэс йылпумъяса, кудзэ ке бадӟымзэгес ужасез юри погырто, яке кин ке музъеме ачиз погра – картофка мед удалтоз, пограм адями быдӟа мед будоз шуыса. Та выллем дауртонъёс пыр асьме дорозь вашкала осконъёс вуиллям. Азьло ю мед удалтоз шуыса озьы выро вылэм, музъемлэсь пушйытӥсь-йылытӥсь кужымзэ будэтыны турттыса.
Ужзы бырем бере ваньзы корка сиськыны пыро. Ӝӧк вылын – сӥлен шыд но мукет пӧраськемъёс. Гуртамы одно ик курегпуз пӧзьтыса пукто на. Кызьы вашкала гожтосъёсысь тодӥськом, азьло гырон-кизён ужъёсты курегпузэн тодметъяло вылэм. Бусые «кизьыса», соосты нылпиос ӵошатскыса октозы вылэм. Нош бадӟымъёс куриськем беразы озьы ик курегпуз сиёзы вылэм. Курегпуз – ю удалтонлэн тодметэз. Ю тысьсы курегпуз быдӟа будоз, юзы курегпуз мында трос луоз шуыса оскиллям.
Колхозъёс кылдыса, ас поннад гырон-кизён ужъёс пӧлысь картофка мерттон гинэ кылем бере, бусыын ю кизьыку быдэсъяськись нергеос бакчае кӧчизы, луоз. Соосты сӥзьыл трос картофка октозы, сютэм уз кыле шуыса быдэсъязы. Туэ сыӵе осконъёссы вунэмын ке но, соосты сяме пыременызы ортчытытэк уг кельто.
Озьыен, музее но ветлытэк, бакчае гинэ потыса, вашкалаеныз герӟаськыны быгатӥськом. Мукет гуртъёсын но таӵе сямъёс утиськемын, дыр, шуыса малпасько.
Ранус Садиков, истори наукаосъя доктор.
Бурай ёросысь Касиярово гурт.
Туспуктэмез авторлэн.
Читайте нас: