«Мылкыд ке вань, уж пӧзе»

Тагир Михайловичлэн улон сюресэз быдэсак та хозяйствоен герӟаськемын. Со Вуж Варашын вордӥськем. Пичиысен валъёсты яратэм. Уж сюресэз сконикысен кутскем, собере ветфельдшерын тыршем, ыж фермаен кивалтэм, валтӥсь пудо эмъясьлэсь но ужзэ быдэсъям.

- Азьло гурт улонэз валтэк син азе пуктыны ик уг луы. Котькыӵе уж мед луоз, турын ваён-а, бакча гырон-а, пу дасян-а, валэн ужамы. Азьло колхозын конный двор вань вал. Отчы нуналлы быдэ ветлӥсько вал. Тужгес шаплы вал мед шедёз шуыса, ӵукна вить часын конной дворе ветлылӥ. Пичиысен пудо вордонэн герӟаськем ӧнерез быръён малпанэ луиз. Гуртлэсь палэнэ кошкон сярысь ноку ӧй малпаськы. Гуртын вордӥськи, гуртын улӥсько, - вера Т. М. Насибуллин. - Школаын дышетскыку каникулъёсты чидатэк витьылӥ. Пудо возьманы потто вал, скотникын но ужай.

1984-тӥ арын армиысь бертыса, Тагир Михайлович Шафрановоысь СПТУ-э дышетскыны пырем.

- Колхозмы направлениен ветфельдшерлы дышетскыны ыстӥз, - вера со.

Со дырысен Тагир Михайлович быръем удысаз тырше. Ужатозяз хозяйствоязы вить кивалтӥсьёс воштӥськиллям. Ӧнерчи котькинэн огкыл шедьтыса, ужзэ азинлыко нуэм. 2000-тӥ арысен пудо вордонъя валтӥсь ӧнерчи луэ. Зоотехниклэн но, ветврачлэн но ужъёссы - со вылын.

Ӵем дыръя Тагир Михайлович вазь ӵукнаысен бер ӝытозь уж дураз ӝегатске.

- Гурт удысын пӧртэм дыръёс луо. Пудо сиён дасян вакытэ мукет ужъёс сярысь вунэтыса улоно. Дорысьёсы монэ валало. Семьяе – юн тыбыр пыкетэ, - шуэ Т. Насибуллин.

Тагир Михайлович улон сюрессэ гуртысьтыз ик Вера Валихановнаен герӟам. Кузпалъёс ваньмон дырзэс Диана нылынызы ӵош ортчыто, кырын шутэтскыны ярато. Ӵем шур дуре чорыганы ветло.

- Диана 9-тӥ класс бере дышетскыны пырыны мылкыд кариз. Ижевскын юридической колледжын тодон-вадан басьтэ, - вера Т. Насибуллин.

Школаын дышетскыкуз Дианаез пӧртэм ужрадъёсысь адӟыны луэ вал. Со олимпиадаосын, конкурсъёсын Вуж Вараш школалэсь данзэ быгатыса утьылӥз, удмурт нылъёс пӧлын ортчись республика конкурсын «Чеберина» нимлы кузё луиз.

Тагир агай пичиысен спортэн эшъяськем. Школаын дышетскыкуз ёросазы ортчись куасэн ӵошатсконъёсы, ыбылӥськонъя турниръёсы ветлэмзэ, отысь вормонъёсын бертылэмзэ со али но тодаз возе. Аслэсьтыз егит дырзэ туала егитъёсын ӵошатыса шуэ:

- Туала егитъёслэн юэмзылы, тамак кыскемзылы паймисько. Соос мар меда малпало? Азьпалан кызьы улыны туртто?

Азьло Янаул ёросысь хозяйствоос пӧлын но спорт ӵошатсконъёс ортчылӥллям. Отын но востокъёс вормонъёслы кузё луо вылэм.

Вуж Вараш гурт поселенын спорт ӵошатсконъёс ӵем радъясько. Гурт поселенилэн администрациезлэн кузьымезлы - Выль ар торт понна - ӵошатскон ортчытон ӟеч йылоллы пӧрмемын.

- Ӵошатсконын гурт поселениысь пӧртэм интыосын ужасьёс кужымзэс мертало. Арлы быдэ спортлэсь мукет видзэ бырйиськом. Азьло аръёсы волейболъя, футболъя, хоккейен шудонъя ӵошатсконъёс радъяськизы, кылем арын ӝӧквыл теннисэн шудонъя ӵошатскон ортчиз, - вера Тагир Михайлович.

Калыкын юнме вераллямтэ, душес - бурдъёсыныз кужмо, адями уженыз дано луэ шуыса. Тыршыса быдэстэм ужез калык но, кивалтэт но синйылтытэк уг кыльы.

Сӥё-дано ужасьлэсь ӟеч ӧнерчи луэмзэ утэм вормонъёсыз но возьмато. Куамын вить ар ӵоже хозяйствоын ужатозяз солэн Тау карон гожтэтъёсыз, Данъян грамотаосыз трос люкаськемын. Пӧлазы – бадӟымесь республика наградаос. 2006-тӥ арын Тагир Михайловичлы Башкортостанлэн Правительствоезлэн Данъян грамотаез сётэмын. 2014-тӥ арын ужез Башкортостан Республикалэн Данъян грамотаеныз пусъемын.

- Мылкыд ке вань, уж пӧзе, - шуэ Тагир Михайлович. Ӧнерчи уж дураз пумиськись шуг-секытъёсыз сярысь вераськыны уг яраты. Калыкен ӵош кариськыса, котьмае вормыны луэ, пе. Азьло ужам аръёссэ туннэ нуналэн ӵошатыса со вера:

- Котькуд вакытлэн аспӧртэмлыкъёсыз вань. Пусъёно, милям хозяйствомы котьку азьветлӥсьёс радын луиз. Пудо трос вордӥськом вал. Нош гыроно-кизёно музъеммы пичи. Соин пудо сиён ласянь шуг-секытъёс кылдылӥзы. Но калык тыршыса ужа вал. Али троссэ ужъёсты техника быдэсъя ке но, егитъёсты гурт удысэ ужаны поттыны секыт: Хозяйствоямы молокопровод, кормораздатчикъёс вань. Электропастухен но пайдаяськиськом. Туала улонэн валче вамышъяськом.