Зоръёс люкетӥзы ке но, ю-нянь октон дыраз йылпумъяськиз

Башкортостанлэн Тӧроез Радий Хабиров Россиысь правительстволы «Обновление парка техники» программаез паськытатыны курыса вазиськиз. РФ-ысь министръёслэн кабинетазы ортчем заседаниын регионэн кивалтӥсь Росагролизинг проектлэсь ӟеч луонлыкъёссэ пусйиз. Таӵе юрттэт луэмен, Башкортостанысь аграриос 500 миллион манет тыр техника басьтӥллям.

- Милемлы 1200 ю тысь октон комбайнъёс, куинь сюрслы матэ тракторъёс уг тырмо, - вераз Радий Хабиров. Со сяна, со республикаын кылдэм шуг-секытъёс сярысь но кылпум ӝутӥз: тулыс регионамы 170 сюрс гектаре кизем юос быризы, 585 предприятиос 865 миллион коньдонзэс ыштӥзы.

- Ю-нянь октонэз но капчи ӧй вал. Тужгес секыт йӧтӥз республикалэн уйпал ёросъёсаз тыршись нянь будэтӥсьёслы. Берло дас арез учконо ке, таиз ю тысь октон вакыт тужгес секытэн лыдъяське, - вотэсбамъёсы гожтэ Радий Хабиров. – Сыӵе тыршыса ужасьёс шоры учкыса валаськод, асьсэ ужзэс яратӥсь но гажась, данъяськымон адямиос котькуд удысын вань шуыса.

Башкортостан Республикаысь Гурт хозяйствоя министерствоын ивортэмзыя, республикаын 3 миллион 140 сюрс тонна тысё но тысё-кӧжыё культураос кутсамын (лыдпусъёс 4-тӥ коньывуонэ басьтэмын). Ю тысьлэн удалтонлыкез гектарысьтыз 19,8 центнерлы ӵоша.

Татышлы ёросын ю-нянь октонзэс котькинлэсь ӝог йылпумъязы «Агро-Танып» СПК-ысь нянь будэтӥсьёс. СПК-ын быдэстӥськем ужъёсын тодматыса, хозяйствоысь валтӥсь агроном Денис Мардамшин вера:

- Ужаны зоръёс люкетӥзы ке но, ӵошен кариськыса, ю тысь октонэз йылаз-пумаз вуттӥм, гектарысьтыз дас тямыс центнер ю тысь басьтӥм. Котькуд ужась жадёнэз валатэк ужаз. Юэз погыртонын тыршизы Фарит Миниахметов, Вадим Камидуллин. Ю тысь октон комбайнъёсын ужазы Генрих Шайхетдинов, Алексей Шайсултанов но Валерий Бадретдинов.

Кутсам ю тысез дыраз амбаре вуттон сярысь водитель Геннадий Байрамшин, трактористъёс Дмитрий Бактиев, Алексей Костин сюлмаськиллям. Ю тысез мертан ужъёсты Фёдор Шайхетдинов но Лариса Камидуллина быдэсъяллям. Амбаре вуттэм ю тысез интыянын Григорий Хайдаршинэн Станислав Шайсултанов тыршиллям.

Бусыосысь ю тысез октыса гинэ уж уг быры, сое дыраз сузяно, куасьтоно. «Агро-Таныпын» та ужъёс Дмитрий Алетдинов, Вячеслав Зидымышев, Альбина Рахимова, Илюза Хусаинова, Арсений Байдиев вылын луиллям.

Тысё культураосты октыса, ю-нянь октон дыр йылпумъяськиз шуыны уг луы. Республикаосысь хозяйствоосын сакыр кушман октон азинске. Солэн удалтонлыкез гектарысьтыз 360 центнерлы вуэ. Аграриосын кумбагыш октон ужъёс но мыно. Огъя 248 гектаре мерттэм кумбагышлэн та дыре кызь куинь процентэз (лыдпус 7-тӥ коньывуонэ басьтэмын) октэмын. Солэн удалтонлыкез гектарысьтыз дас ньыль центнер усе.

Миляуша БУЛАТОВА.

Туспуктэм вылын: Фарит Миниахметов (паллянысен буре), Алексей Шайсултанов, Валерий Бадретдинов но Генрих Шайхетдинов.