-8 °С
Лымы
Антитеррор
Вань иворъёс
Гурт удыс
6 южтолэзь 2019, 16:59

Вормон понна саесъёсты пужалляса ужано

Республикаысьтымы гурт хозяйствоосын 2018-тӥ арын быдэстэм ужзылы йылпумъянъёс лэсьтон азинтӥське. Со толшор толэзьысен кыстӥське ни. Янаул ёросысь «Колхоз Восток» СПК-ын ужасьёс, кылсярысь, кылем арын быдэстэм ужъёссы пумысен 25-тӥ толшоре кенешизы, нош Татышлы ёросысь «АгроТанып» СПК-ын ужасьёс - 1-тӥ южтолэзе. Пӧртэм ёросъёсысь кык азьмынӥсь хозяйствоослэн ужъёсынызы тӥледлы но тодматскыны ӵектӥськом.

«Колхоз Восток» СПК-ысь ӧнерчиослэн кылъёсазы трос пӧртэм лыдпусъёс «шудӥзы». Востокъёслэн вань угось маин данъяськыны: соос пудо вордонын но, ю-нянь будэтонын но азьмынӥсьёс пӧлын. Кылем арын соос огъя 65177 сюрс манет коньдон поттыны быгатӥзы. Солэн бадӟым люкетэз пудо вордонэн герӟаськемын. Востокъёсын 2378 тонна йӧл кыскемын, татын одӥг скаллэсь 6000 килограммлэсь тросгес йӧл дасяло. Ар ӵоже 537 кунян басьтэмын, 132 тонна пудо будэтэмын.
Тысё но тысё-кӧжыё культураос 1800 гектаре киземын вал. Соослэн удалтонлыксы 3250 тонналы вуиз (гектарысьтыз 18,1 центнер луиз). Кылем арын востокъёслэн пудо сиёнэн но сюлмаськонзы ӧз луы, сое дыраз тырмыт дасяны быгатӥзы. Кивалтэт ужась калыксэ но турынэн, ю тысен тырмытыны тыршиз. Пусйытэк кельтыны уг луы ӝутӥськонэн герӟаськем ужъёсты но. Нанядыысь фермае, кылсярысь, выль корпус ӝутэмын. Со 126 йыр куайытоно пудоослы чакламын. Трактор-комбайнъёс сярысь ке верано, кылем арын востокъёс 3 млн 5 сюрс манет тыр куать техника басьтыны быгатӥзы.
Востокъёслэн лыдпусъёссы бадӟымесь вормонъёссы сярысь ке но верало, татысь ӧнерчиос соосын буйгатскыны уг дырто. Соос трослы азьпала учкыны дышемын угось. Хозяйствоен кивалтӥсьлэн Владимир Камиуллинлэн верамезъя, азьланяз вань янгышъёсты тупатыса, азьпала йыгмыт вамыштыны тыршоно. Но… Владимир Касимович собраниын ассэ кивалтӥсьлэн ужысьтыз мозмытыны куриз. Ужасьёсыз, мылкыдтэк ке но, соглаш кариськизы. Табере кужмо «Колхоз Восток» СПК-ен азьвыл валтӥсь бухгалтерзы Олег Зайнуллин кивалтэ.
Владимир Касимович «Колхоз Восток» СПК-ен 27 ар кивалтӥз. Та дыр ӵоже трос бадӟым ужъёс быдэстӥз. «Со тӥляд, ужась калыклэн, кужымез. Огнам мон номыр ӧй карысал, - шуиз Владимир Касимович. - Шумпотӥсько, татын кужмо ужасьёс, усто ӧнерчиос тыршо шуыса. Азьланяз быдэстоно малпанъёс трос. Оскисько, тӥляд ваньмыз пӧрмоз шуыса».
* * *
«Агро-Танып» СПК понна 2018-тӥ ар сокем капчи ке но ӧз сётӥськы, шумпотымонэз трос. Тулыс бусы ужъёсты быдэстонын соослэн тыршемзы ёросын нырысетӥ степенё дипломен пусъемын, 2018-тӥ арын ужамзы – кыкетӥ степенё дипломен но БР-ысь Правительстволэн дипломеныз.
Кылем арын таныпъёс огъя 24649 центнер ю тысь октӥзы. 2017-тӥ арен ӵошатыса, та лыдпус 122 процентлы ӵоша. Нош ю-няньзылэн удалтонлыкез гектарысьтыз 20 центнер усиз.
Таныпъёс тросгес коньдон потто пудо утёнлэсь, шонергес вераса, йӧллэсь. Кылем арын соос 14567 центнер йӧллэсь 28 млн 135 сюрс манет табыш пыртӥллям. Зэм, 2017-тӥ арен ӵошатыса, таныпъёс кылем арын йӧллэсь вить миллионлэсь тросгес коньдонзэс ыштӥллям. Со ӧжытгес йӧл вузамен но солэн дуныз усемен герӟаськемын. Валля арын йӧлэз 20,43 манетэн ке басьтӥллям, 2018-тӥ арын – 17,78 манетэн. Дунъёслэн воштӥськемзы ар ӵоже хозяйстволэсь олокӧня миллион манетсэ ыштэ. Озьы ке но таныпъёслэн ӝожтӥськыны дырзы ӧвӧл, соос техниказэс выльдон, ӝутӥськон ужъёссэс быдэстон сярысь сюлмасько. Туннэ соослэн 15 тракторзы, сизьым грузовой машиназы, куать комбайнзы лыдъяське. Таныпъёс арысь аре выль техника басьтыны тыршо.
Хозяйствоен кивалтӥсьлэн, татысь ӧнерчиослэн верамзыя, «Агро-Танып» СПК-ын котькуд ужась ас удысаз тыршыса, ужзэ йылаз-пумаз вуттыса лэсьтэ. Тыршемзылэн емышез – ӟеч уждун но вылӥ дунъет.
«Государствомы но гурт калыклы юрттыны тырше, - вера хозяйствоен кивалтӥсь С. Т. Ханов. – «Агро-Танып» СПК соин пайдаяське. Кылем арын хозяйствомы 5 млн 868 сюрс манет субсидия басьтӥз. Со пӧлысь одӥг миллион 044 сюрс манетэз – техника басьтыны, кык миллион 993 сюрсэз – вузам йӧллы.
Таныпъёс 2018-тӥ арын лэсьтэм ужзылы йылпумъянъёс лэсьтыса ӧз вуттэ на, вуоноез сярысь малпаськыны кутскизы ни. Туэ соос 300 йыр скаллы чаклам гид ӝутыны малпало. Со сяна, МТФ-е нуись сюресъёсты но тупатоно. Озьыен, гурт хозяйствоын шутэтскыны дыр ӧвӧл. Вормон понна ар ӵоже саесъёсты пужалляса ужано.
Дасяз Ольга НИГАМАТУЛЛИНА.
Туспуктэм вылын: Янаул ёрос администрациен кивалтӥсь И. Вазигатов В. Камиуллинэз ӟечкыла; вераське Татышлы ёрос администрациен кивалтӥсьлэн воштӥсез, финансъёсъя управлениен кивалтӥсь Р. Магзумов.
Читайте нас в